കൊച്ചി: സെൻ ടെക്നോളജീസ് ഓഹരിയിൽ ആറ് വർഷം മുൻപ് നിക്ഷേപിച്ച ഒരു ലക്ഷം രൂപ ഇന്ന് 70 ലക്ഷം രൂപയായി വളർന്നു. ഓഹരി വിപണിയിൽ ശരിയായ നിക്ഷേപങ്ങൾ നടത്തുന്നത് വഴി വലിയ നേട്ടങ്ങൾ സ്വന്തമാക്കാൻ സാധിക്കുമെന്നതിന്റെ ഏറ്റവും മികച്ച ഉദാഹരണമാണ് സെൻ ടെക്നോളജീസ് നൽകുന്നത്. അടുത്തിടെ ലഭിച്ച പുതിയ ആയുധ നിർമ്മാണ ലൈസൻസോടെ, വരും ദിവസങ്ങളിലും ഓഹരിക്ക് മികച്ച മുന്നേറ്റം പ്രകടമാക്കാൻ സാധ്യതയുണ്ട്.
2020 മാർച്ചിൽ കോവിഡ് പ്രതിസന്ധിയുടെ സമയത്ത് വെറും 25 രൂപയായിരുന്ന ഓഹരി വില, 2026 ഏപ്രിലിൽ 1,825 രൂപയിലെത്തി. കഴിഞ്ഞ ഒരു മാസത്തിനിടെ 24 ശതമാനത്തിലധികവും, ഈ വർഷം ഇതുവരെ 28.93 ശതമാനവും ഓഹരി നേട്ടമുണ്ടാക്കി. കഴിഞ്ഞ മൂന്ന് വർഷത്തിനിടെ 471.69 ശതമാനവും, അഞ്ച് വർഷത്തിനിടെ 2257.28 ശതമാനവും ഓഹരി ഉടമകൾക്ക് ലാഭം നേടാനായി. ഈ വർഷം തുടക്കത്തിൽ 1,355 രൂപയായിരുന്ന ഓഹരി, എൻഎസ്ഇയിൽ (NSE) 1,825 രൂപയിലാണ് നിലവിൽ വ്യാപാരം നടക്കുന്നത്.
ഏപ്രിൽ 17-ന് പ്രതിരോധ മന്ത്രാലയത്തിൽ നിന്ന് 12.7mm, 23mm, 30mm, 40mm പീരങ്കികൾ നിർമ്മിക്കാനുള്ള ലൈസൻസ് ലഭിച്ചത് കമ്പനിയുടെ വളർച്ചയിൽ നിർണായക പങ്കുവഹിച്ചു. ഈ പുതിയ സംവിധാനങ്ങൾ വ്യോമ പ്രതിരോധം, നാവിക പ്രവർത്തനങ്ങൾ, ഡ്രോൺ പ്രതിരോധം തുടങ്ങിയ മേഖലകളിൽ നിർണായക പങ്ക് വഹിക്കും. ആഗോള തലത്തിൽ പ്രതിരോധ മേഖലയ്ക്ക് ലഭിക്കുന്ന വർധിച്ചുവരുന്ന പ്രാധാന്യം, സെൻ ടെക്നോളജീസ് പോലുള്ള ആഭ്യന്തര പ്രതിരോധ നിർമ്മാണ കമ്പനികൾക്ക് വലിയ തോതിൽ ഗുണകരമാകും. വർധിച്ചുവരുന്ന ഡ്രോൺ ആക്രമണങ്ങളുടെ പശ്ചാത്തലത്തിൽ, ഈ കമ്പനിക്ക് വലിയ ബിസിനസ് സാധ്യതകളാണ് തുറന്നുകിട്ടുന്നത്.
