ഗ്ലാസ്ഗോ: ലോകകപ്പ് ഗ്രൂപ്പ് ഘട്ടത്തില് പുറത്തായതിനെ തുടര്ന്ന് സ്റ്റീവ് ക്ലാര്ക്ക് സ്ഥാനമൊഴിഞ്ഞതിന് പിന്നാലെ സ്കോട്ട്ലന്ഡ് പുതിയ പരിശീലകനായി സെബാസ്റ്റ്യന് പോക്കോനോളിയെ നിയമിച്ചു. മുന് ബെല്ജിയം താരമായ 39 വയസ്സുകാരന് രണ്ട് വര്ഷത്തെ കരാറിലാണ് സ്കോട്ടിഷ് ടീമിന്റെ ചുമതലയേറ്റത്. 2028ലെ യൂറോ കപ്പ് വരെ അദ്ദേഹത്തിന്റെ കരാര് തുടരും. ഈ ടൂര്ണമെന്റിന് സ്കോട്ട്ലന്ഡ് സഹ ആതിഥേയത്വം വഹിക്കുന്നുണ്ട്.
ഫ്രഞ്ച് ക്ലബ്ബായ മൊണാക്കോ കഴിഞ്ഞ ജൂണ് ഒന്നിന് പോക്കോനോളിയെ പരിശീലക സ്ഥാനത്തുനിന്ന് പുറത്താക്കിയിരുന്നു. ഫ്രഞ്ച് ലീഗില് ഏഴാം സ്ഥാനത്ത് ഫിനിഷ് ചെയ്തതും ചാമ്പ്യന്സ് ലീഗ് യോഗ്യത നേടാനാകാതിരുന്നതുമായിരുന്നു ഇതിന് കാരണം. 2025ല് യൂണിയന് സെന്റ്-ഗില്ലോയിസിനെ 90 വര്ഷത്തിന് ശേഷം ആദ്യമായി ബെല്ജിയന് ലീഗ് കിരീടത്തിലേക്ക് നയിച്ചത് പോക്കോനോളിയുടെ പരിശീലക കരിയറിലെ പ്രധാന നേട്ടമാണ്. യൂറോപ്പിലെ വളര്ന്നുവരുന്ന മികച്ച പരിശീലകരിലൊരാളായാണ് സ്കോട്ടിഷ് ഫുട്ബോള് അസോസിയേഷന് അദ്ദേഹത്തെ വിശേഷിപ്പിച്ചത്.
പുതിയ ഉത്തരവാദിത്തം ലഭിച്ചതില് ഏറെ ആവേശമുണ്ടെന്ന് പോക്കോനോളി പ്രതികരിച്ചു. 28 വര്ഷത്തെ ഇടവേളയ്ക്ക് ശേഷം സ്കോട്ട്ലന്ഡ് ലോകകപ്പില് കളിച്ചപ്പോള് ആരാധകര് പ്രകടിപ്പിച്ച ആവേശം തന്നെ ഏറെ ആകര്ഷിച്ചതായി അദ്ദേഹം വ്യക്തമാക്കി. ആക്രമണാത്മകവും മുന്നേറ്റത്തിന് പ്രാധാന്യം നല്കുന്നതുമായ ശൈലി ടീമില് നടപ്പിലാക്കാനാണ് പോക്കോനോളിയുടെ ലക്ഷ്യമെന്ന് സ്കോട്ടിഷ് എഫ്എ ചീഫ് ഫുട്ബോള് ഓഫീസര് ക്രെയ്ഗ് മള്ഹോളണ്ട് പറഞ്ഞു. ആരാധകരെ ആവേശത്തിലാക്കുന്ന ഫുട്ബോള് കാഴ്ചവെക്കുകയാണ് ടീമിന്റെ ലക്ഷ്യമെന്നും അദ്ദേഹം കൂട്ടിച്ചേര്ത്തു. സെപ്റ്റംബര് അവസാനം നടക്കുന്ന നേഷന്സ് ലീഗ് മത്സരങ്ങളിലാകും പോക്കോനോളിയുടെ കീഴില് സ്കോട്ട്ലന്ഡ് ആദ്യമായി കളത്തിലിറങ്ങുക. സ്ലൊവേനിയക്കും സ്വിറ്റ്സര്ലന്ഡിനുമെതിരെയാണ് ടീമിന്റെ ആദ്യ മത്സരങ്ങള്.
