ഗുരുവായൂർ: സ്വർണ്ണവിലയിൽ വീണ്ടും വർദ്ധനവ്. സംസ്ഥാനത്ത് പവന് 200 രൂപയാണ് ഇന്ന് വർദ്ധിച്ചത്. ഇതോടെ ഒരു പവൻ സ്വർണ്ണത്തിന് 1,06,040 രൂപയും, ഒരു ഗ്രാം സ്വർണ്ണത്തിന് 13,255 രൂപയുമാണ് ഇന്നത്തെ വിപണി വില. രാജ്യാന്തര വിപണിയിൽ സ്വർണ്ണവില ട്രോയ് ഔൺസിന് 4,079.95 ഡോളറിലാണ് വ്യാപാരം പുരോഗമിക്കുന്നത്. വെള്ളിയുടെ വില കിലോഗ്രാമിന് 2,40,000 രൂപയായും ഉയർന്നു.
കഴിഞ്ഞ ആഴ്ചയിൽ സ്വർണ്ണവിലയിൽ കാര്യമായ ചാഞ്ചാട്ടമാണ് പ്രകടമായത്. കഴിഞ്ഞ വെള്ളിയാഴ്ച മൾട്ടി കമ്മോഡിറ്റി എക്സ്ചേഞ്ചിൽ (MCX) 10 ഗ്രാം സ്വർണ്ണത്തിന് 1,44,199 രൂപയായിരുന്നു വില. ഇതേ കാലയളവിൽ വെള്ളി വില കിലോഗ്രാമിന് 1.11 ശതമാനം വർദ്ധിച്ച് 2,22,100 രൂപയിലെത്തിയിരുന്നു. എങ്കിലും ബുള്ളിയൻ വിപണിയിൽ ആഴ്ചാവസാനം സ്വർണ്ണ വിലയിൽ രണ്ട് ശതമാനത്തിലധികം ഇടിവും വെള്ളിയിൽ അഞ്ച് ശതമാനത്തിലധികം ഇടിവും രേഖപ്പെടുത്തിയിരുന്നു.
യുഎസ്-ഇറാൻ സംഘർഷം ക്രൂഡ് ഓയിൽ വിലയെ സ്വാധീനിക്കുന്നത് സ്വർണ്ണവിലയിലും താൽക്കാലിക പ്രതിഫലനങ്ങൾ ഉണ്ടാക്കുന്നുണ്ട്. യുഎസ് പണപ്പെരുപ്പ ഡാറ്റ നിരക്ക് വർദ്ധനവിന്റെ സൂചനകൾ മയപ്പെടുത്തിയെങ്കിലും, വിപണിയിൽ സ്വർണ്ണത്തിന് നേരിയ ബെയറിഷ് പ്രവണതയാണുള്ളതെന്ന് സാമ്പത്തിക വിദഗ്ധർ വിലയിരുത്തുന്നു. തുടർച്ചയായ നാലാമത്തെ ആഴ്ചയാണ് ആഗോള വിപണിയിൽ സ്വർണ്ണവിലയിൽ ഇടിവ് രേഖപ്പെടുത്തുന്നത്.
