നൈസ്: ഫ്രാന്സിലെ നൈസ് നഗരത്തില് ഇന്ത്യന് പ്രധാനമന്ത്രി നരേന്ദ്ര മോദിയും ഫ്രഞ്ച് പ്രസിഡന്റ് ഇമ്മാനുവല് മാക്രോണും സംയുക്തമായി ‘ഭാരത് ഇന്നൊവേറ്റ്സ്’ പരിപാടി ഉദ്ഘാടനം ചെയ്തു. ഇന്ത്യയിലെയും ഫ്രാന്സിലെയും മറ്റ് രാജ്യങ്ങളിലെയും പ്രമുഖ സ്റ്റാര്ട്ടപ്പുകളെയും വെഞ്ച്വര് കാപ്പിറ്റല് ഫണ്ടുകളെയും ഒന്നിപ്പിക്കുന്ന ആഗോള വേദിയാണിത്. ഉഭയകക്ഷി ചര്ച്ചകള്ക്ക് മുന്നോടിയായി വേദിയിലെത്തിയ മോദിയെ കെട്ടിപ്പിടിച്ചും ഹസ്തദാനം നല്കിയുമാണ് മാക്രോണ് സ്വീകരിച്ചത്. ഫ്രാന്സ്, സ്ലൊവാക്യ എന്നീ രാജ്യങ്ങളിലേക്കുള്ള തന്റെ അഞ്ച് ദിവസത്തെ യൂറോപ്പ് പര്യടനത്തിന്റെ ഭാഗമായാണ് പ്രധാനമന്ത്രി നൈസില് എത്തിയത്. നൈസ് കോട്ട് ഡി അസൂര് വിമാനത്താവളത്തില് ഫ്രഞ്ച് ഉന്നത ഉദ്യോഗസ്ഥരും ഇന്ത്യയിലെ ഫ്രഞ്ച് അംബാസഡര് തിയറി മാതുവും ചേര്ന്ന് അദ്ദേഹത്തെ സ്വീകരിച്ചു.
ഇരുപത്തിയൊന്നാം നൂറ്റാണ്ടില് ഇന്ത്യ വലിയൊരു പരിവര്ത്തനത്തിന് സാക്ഷ്യം വഹിക്കുകയാണെന്ന് ചടങ്ങില് പ്രധാനമന്ത്രി പറഞ്ഞു. പുതിയ ചിന്താഗതിയുള്ള യുവ ഇന്ത്യക്കാര് മാനവികതയുടെ നന്മയ്ക്കായി സ്റ്റാര്ട്ടപ്പ് വിപ്ലവം നയിക്കുകയാണ്. ഇന്ത്യ ഇന്ന് ലോകത്തിന് വെറുമൊരു ഉപഭോക്താവ് മാത്രമല്ല, പ്രതിസന്ധികള്ക്ക് പരിഹാരം കാണുന്ന രാജ്യമായി മാറിയിരിക്കുന്നു. സാങ്കേതികവിദ്യ മാനവികതയ്ക്ക് വേണ്ടിയുള്ളതാകണം. ഇന്നൊവേഷന് എന്നത് ഇന്ത്യയുടെ ഡിഎന്എയില് ഉള്ളതാണെന്നും അദ്ദേഹം കൂട്ടിച്ചേര്ത്തു. ഈ പരിപാടി സംഘടിപ്പിക്കുന്നതില് ഐഐടി ഡല്ഹി ബോര്ഡ് ചെയര്മാന് ഹരീഷ് സാല്വെയും സംഘവും വലിയ സംഭാവനയാണ് നല്കിയത്.
ഇന്ത്യ-ഫ്രാന്സ് ബന്ധം പങ്കുവെക്കപ്പെട്ട കാഴ്ചപ്പാടുകളാല് നയിക്കപ്പെടുന്ന ഒന്നാണെന്ന് വിശേഷിപ്പിച്ച മോദി, ഈ വര്ഷം ഫെബ്രുവരിയില് ആരംഭിച്ച ‘ഇന്ത്യ-ഫ്രാന്സ് ഇന്നൊവേഷന് വര്ഷം’ ഇരു രാജ്യങ്ങളും തമ്മിലുള്ള സഹകരണം കൂടുതല് ശക്തമാക്കിയതായും വ്യക്തമാക്കി. പ്രധാനമന്ത്രിയുടെ നേതൃപാടവത്തെ അഭിനന്ദിച്ച ഇമ്മാനുവല് മാക്രോണ്, ഇന്ത്യയുടെ ബഹിരാകാശ നേട്ടങ്ങളെ പ്രത്യേകം പരാമര്ശിച്ചു. യൂറോപ്പും അമേരിക്കയും ചേര്ന്നുള്ളതിനേക്കാള് കൂടുതല് എഞ്ചിനീയര്മാരെ സൃഷ്ടിക്കുന്ന ഇന്ത്യ, അതിവേഗം ഒരു ആഗോള ഇന്നൊവേഷന് ലീഡറായി ഉയര്ന്നുവരികയാണെന്നും മാക്രോണ് കൂട്ടിച്ചേര്ത്തു. ഈ വര്ഷം തുടക്കത്തില് ‘പ്രത്യേക ആഗോള തന്ത്രപരമായ പങ്കാളിത്തം’ എന്ന നിലയിലേക്ക് ഉയര്ത്തിയ ഇന്ത്യ-ഫ്രാന്സ് ഉഭയകക്ഷി ബന്ധത്തിന്റെ സമഗ്രമായ അവലോകനവും സന്ദര്ശനത്തിന്റെ ഭാഗമായി നടക്കും.
