മുംബൈ: ജിയോ ഐപിഒയിൽ വമ്പൻ ട്വിസ്റ്റ്; ഓഫർ ഫോർ സെയിൽ (ഒഎഫ്എസ്) ഒഴിവാക്കി മുകേഷ് അംബാനി. റിലയൻസ് ഇൻഡസ്ട്രീസിൽ നിന്നും ജിയോ ഐപിഒയ്ക്കായി കാത്തിരിക്കുന്ന നിക്ഷേപകർക്ക് ഇതൊരു സന്തോഷ വാർത്തയാണ്. ജിയോ ഐപിഒയുടെ ഘടന മാറ്റുന്നതിനായി മുകേഷ് അംബാനി നേരിട്ട് ഇടപെടുന്നുവെന്നാണ് പുതിയ റിപ്പോർട്ടുകൾ. ഐപിഒ നടപടികൾ പൂർണ്ണമായും ഓഫർ ഫോർ സെയിലിൽ (ഒഎഫ്എസ്) നിന്ന് മാറ്റി പുതിയ ഇഷ്യുവിലേക്ക് (Fresh Issue) കൊണ്ടുവരാനാണ് റിലയൻസിന്റെ പുതിയ നീക്കം. റീട്ടെയിൽ നിക്ഷേപകരെ സംരക്ഷിക്കുന്നതിനൊപ്പം കമ്പനിയുടെ ബാലൻസ് ഷീറ്റ് ശക്തിപ്പെടുത്തുക എന്ന ലക്ഷ്യവും ഈ തന്ത്രപരമായ നീക്കത്തിന് പിന്നിലുണ്ട്.
ഓഹരി ഉടമസ്ഥതയിലെ ഈ മാറ്റം മനസ്സിലാക്കാൻ ഒഎഫ്എസും പുതിയ ഇഷ്യുവും തമ്മിലുള്ള പ്രധാന വ്യത്യാസങ്ങൾ അറിഞ്ഞിരിക്കണം. ഒഎഫ്എസ് വഴി സമാഹരിക്കുന്ന പണം കമ്പനിക്കല്ല, മറിച്ച് മെറ്റാ, ഗൂഗിൾ തുടങ്ങിയ മുൻകാല നിക്ഷേപകരായ സ്ഥാപനങ്ങളുടെ പോക്കറ്റിലേക്കാണ് എത്തുക. എന്നാൽ പുതിയ ഇഷ്യു വഴി എത്തുന്ന പണം നേരിട്ട് ജിയോ പ്ലാറ്റ്ഫോമിലേക്കാണ് വരുന്നത്. ഒഎഫ്എസിൽ പുതിയ ഓഹരികൾ ഉണ്ടാകുന്നില്ല; നിലവിലെ ഓഹരികൾ കൈമാറ്റം ചെയ്യപ്പെടുക മാത്രമാണ് ചെയ്യുന്നത്. അതിനാൽ മൂലധനത്തിൽ മാറ്റമില്ല. എന്നാൽ പുതിയ ഇഷ്യു വരുമ്പോൾ പുതിയ ഓഹരികൾ ഇറക്കുന്നതിനാൽ ഓഹരി മൂലധനം വർദ്ധിക്കുന്നു. നിലവിലെ നിക്ഷേപകർക്ക് ലാഭമുണ്ടാക്കി പുറത്തുകടക്കാനുള്ള അവസരമാണ് ഒഎഫ്എസ്. ഇതിൽ വിൽപനക്കാരന്റെ ലാഭം പരമാവധി വർദ്ധിപ്പിക്കുന്നതിനായി ഓഹരികൾക്ക് ഉയർന്ന വില നിശ്ചയിക്കാൻ സാധ്യതയുണ്ട്. എന്നാൽ പുതിയ ഇഷ്യുവിന്റെ ലക്ഷ്യം കമ്പനിയുടെ വളർച്ചയും കടം വീട്ടലുമാണ്. ഇത് കൂടുതൽ ന്യായവും വിപണിക്ക് അനുകൂലവുമായ ഓഹരി വിലയിലേക്ക് നയിക്കുന്നു.
കമ്പനിയുടെ മൂല്യനിർണ്ണയവുമായി ബന്ധപ്പെട്ട താൽപ്പര്യങ്ങളുടെ സംഘർഷമാണ് റിലയൻസിനെ ഒഎഫ്എസ് നടപടികളിൽ നിന്നും പിന്തിരിപ്പിച്ചത്. നിലവിലുള്ള പ്രൈവറ്റ് ഇക്വിറ്റി നിക്ഷേപകർ തങ്ങളുടെ ലാഭം പരമാവധിയാക്കാൻ ഉയർന്ന മൂല്യനിർണ്ണയം ആവശ്യപ്പെട്ടു. എന്നാൽ ഇത് അമിതമാണെന്നും, അത്തരം അമിത വിലയിരുത്തലുകൾ ഓഹരി വിപണിയിലെ ലിസ്റ്റിംഗിനെ പ്രതികൂലമായി ബാധിക്കുമെന്നും റിലയൻസ് വിലയിരുത്തുന്നു. സാധാരണ നിക്ഷേപകർക്കും ആദ്യ ദിനം തന്നെ ലാഭം ലഭിക്കണമെന്നാണ് അംബാനി ആഗ്രഹിക്കുന്നത്. കൂടാതെ, ഒഎഫ്എസിനൊപ്പം പുതിയ ഇഷ്യു കൂടി അനുവദിച്ചാൽ ഐപിഒയുടെ വലുപ്പം വളരെ വലുതാകും. നിലവിലെ ആഗോള സാഹചര്യത്തിൽ ഇത്രയും വലിയൊരു നീക്കം വിപണിക്ക് എളുപ്പത്തിൽ ഉൾക്കൊള്ളാൻ കഴിഞ്ഞേക്കില്ല എന്ന കണക്കുകൂട്ടലുമുണ്ട്. പുതിയ ഇഷ്യുവിലേക്ക് മാറുന്നതിലൂടെ ജിയോയിലേക്ക് ഏകദേശം 25,000 കോടി രൂപയുടെ പുതിയ ഫണ്ട് എത്തുമെന്നാണ് പ്രതീക്ഷിക്കുന്നത്. ഈ തുക പ്രധാനമായും കമ്പനിയുടെ ബാധ്യതകൾ തീർക്കാനും, ആർട്ടിഫിഷ്യൽ ഇന്റലിജൻസ് (AI), 5ജി ഇൻഫ്രാസ്ട്രക്ചർ എന്നിവയുടെ വികസനത്തിനും ഉപയോഗിക്കും. പുതിയ ടവറുകൾ, ഡാറ്റാ സെന്ററുകൾ, പുതിയ എഐ സാങ്കേതികവിദ്യകൾ എന്നിവ നിർമ്മിക്കാൻ ഈ ഫണ്ട് ജിയോയെ സഹായിക്കും. ഇത് റീട്ടെയിൽ നിക്ഷേപകർക്ക് വലിയ നേട്ടമാണ്. പുതിയ ഇഷ്യു വരുന്നതിലൂടെ ഐപിഒ വില കൂടുതൽ ന്യായയുക്തമാകാൻ സഹായിക്കും. ഇത് ലിസ്റ്റിംഗിന് ശേഷവും ഓഹരി വില ഉയരാനും മികച്ച റിട്ടേൺ നൽകാനും ഇടയാക്കും.
