തിരുവനന്തപുരം: കേരള ക്രിക്കറ്റ് ലീഗിന്റെ മൂന്നാം സീസണിന് മുന്നോടിയായി നിലവിലെ ചാമ്പ്യന്മാരായ കൊച്ചി ബ്ലൂ ടൈഗേഴ്സിന്റെ പരിശീലന ക്യാമ്പിന് തിരുവനന്തപുരത്ത് തുടക്കമായി. ഓഗസ്റ്റ് 20-ന് ആരംഭിക്കുന്ന കെ.സി.എൽ സീസൺ മൂന്നിനായുള്ള അവസാനഘട്ട ഒരുക്കങ്ങളിലാണ് ടീം ഇപ്പോൾ. കഴിഞ്ഞ സീസണിലെ കിരീട വിജയത്തിന്റെ ആത്മവിശ്വാസവുമായി എത്തുന്ന കൊച്ചി ബ്ലൂ ടൈഗേഴ്സ്, ഇത്തവണയും കിരീടം നിലനിർത്തുക എന്ന ലക്ഷ്യത്തോടെയാണ് പരിശീലന കളത്തിലിറങ്ങിയിരിക്കുന്നത്.
ടീമിലെ താരങ്ങളുടെ ശാരീരികക്ഷമത, മത്സരസജ്ജത, ടീം കോമ്പിനേഷൻ, തന്ത്രപരമായ തയ്യാറെടുപ്പുകൾ എന്നിവയ്ക്കാണ് ക്യാമ്പിൽ പ്രധാനമായും മുൻഗണന നൽകുന്നത്. പുതിയ സീസണിലേക്ക് ടീമിനെ കൂടുതൽ ശക്തമാക്കുന്നതിന്റെ ഭാഗമായി പരിചയസമ്പന്നരായ താരങ്ങൾക്കൊപ്പം മികച്ച യുവതാരങ്ങളെയും ഉൾപ്പെടുത്തി സന്തുലിതമായ ഒരു സ്ക്വാഡിനെയാണ് കൊച്ചി ബ്ലൂ ടൈഗേഴ്സ് ഒരുക്കിയിരിക്കുന്നത്. പരിശീലന മത്സരങ്ങൾ, നെറ്റ് സെഷനുകൾ, ഫിറ്റ്നസ് പരിശീലനം എന്നിവയിലൂടെ താരങ്ങളെ പൂർണമായും സജ്ജരാക്കുകയാണ് ലക്ഷ്യം. സാലി സാംസൺ ക്യാപ്റ്റനായും ബേസിൽ തമ്പി വൈസ് ക്യാപ്റ്റനായും ടീമിനെ നയിക്കും. ഹെഡ് കോച്ച് റൈഫി വിൻസെന്റ് ഗോമസിന്റെ നേതൃത്വത്തിലാണ് ടീമിന്റെ സീസൺ മൂന്നിലേക്കുള്ള ഒരുക്കങ്ങൾ പുരോഗമിക്കുന്നത്.
തിരുവനന്തപുരം ക്യാമ്പ് ടീമിന് ഒരുമിച്ച് കൂടുതൽ സമയം ചെലവഴിച്ച് മികച്ച ടീം കോമ്പിനേഷൻ രൂപപ്പെടുത്തുന്നതിനുള്ള നിർണായക ഘട്ടമാണെന്ന് മാനേജ്മെന്റ് വ്യക്തമാക്കി. കഴിഞ്ഞ സീസണിലെ പ്രകടനം ആവർത്തിക്കുന്നതിനൊപ്പം മികച്ച ക്രിക്കറ്റ് കാഴ്ചവെച്ച് ആരാധകർക്ക് അഭിമാനിക്കാവുന്ന മറ്റൊരു സീസൺ സമ്മാനിക്കുകയാണ് ലക്ഷ്യമെന്നും ടീം ഉടമ സുഭാഷ് മാനുവൽ അറിയിച്ചു. കിരീടം നിലനിർത്തുക എന്ന ലക്ഷ്യത്തോടെ ഓരോ താരവും മികച്ച രീതിയിൽ തയ്യാറെടുക്കുന്നുണ്ടെന്നും ടീമിന്റെ ഐക്യവും ആത്മവിശ്വാസവും വളരെ ശക്തമാണെന്നും അദ്ദേഹം കൂട്ടിച്ചേർത്തു.
