സാങ്കേതികലോകം: ആപ്പിൾ പ്രേമികളെ നിരാശയിലാഴ്ത്തിക്കൊണ്ട് ഐഫോൺ 17 സീരീസ് ഫോണുകളുടെ വിലയിൽ വൻ വർധനവുണ്ടാകുമെന്ന് റിപ്പോർട്ടുകൾ. പുറത്തുവരുന്ന വിവരങ്ങൾ അനുസരിച്ച്, ഐഫോൺ 17, ഐഫോൺ 17 എയർ, ഐഫോൺ 17 പ്രോ, ഐഫോൺ 17 പ്രോ മാക്സ് എന്നീ മോഡലുകൾക്ക് 35,000 രൂപ വരെ അധികം നൽകേണ്ടി വന്നേക്കും. ഇതിൽ ഐഫോൺ 17 പ്രോ മാക്സ് മോഡലിനായിരിക്കും ഏറ്റവും ഉയർന്ന വില വർധനവ് ബാധകമാകുക. എന്നാൽ, ഇക്കാര്യത്തിൽ ആപ്പിൾ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.
കഴിഞ്ഞ കുറച്ചു നാളുകളായി ആപ്പിളിന്റെ ഉൽപ്പന്നങ്ങളുടെ വിലയിൽ ആഗോളതലത്തിലും ഇന്ത്യയിലും വർധനവ് പ്രകടമാണ്. മാക്ബുക്കുകൾ, ഐപാഡുകൾ, ഹോംപോഡ് എന്നിവയുൾപ്പെടെയുള്ള ഉൽപ്പന്നങ്ങളുടെ വിലയിൽ കമ്പനി നേരത്തെ മാറ്റങ്ങൾ വരുത്തിയിരുന്നു. അൾട്ര ലക്ഷ്വറി വിഭാഗത്തിൽപ്പെടുന്ന ഉൽപ്പന്നങ്ങൾക്ക് ഒരു ലക്ഷം രൂപ വരെ വില വർധിച്ചിട്ടുണ്ട്. ഉൽപാദന ഘടകങ്ങളുടെ ചിലവിലുണ്ടായ വർധനവാണ് ഇത്തരമൊരു തീരുമാനത്തിലേക്ക് കമ്പനിയെ നയിച്ചതെന്നാണ് സൂചന. വരാനിരിക്കുന്ന ഐഫോൺ 18 സീരീസിലും സമാനമായ രീതിയിൽ ഉയർന്ന വില പ്രതീക്ഷിക്കാവുന്നതാണ്.
ഐഫോൺ സ്വന്തമാക്കാൻ ആഗ്രഹിക്കുന്നവർക്ക് വരാനിരിക്കുന്ന ഫ്ലിപ്കാർട്ട് ഗോട്ട് സെയിൽ (Flipkart GOT Sale) മികച്ചൊരു അവസരമായിരിക്കും. വില വർധനവ് മുന്നിൽക്കണ്ട് പലരും മുൻകൂട്ടി ബുക്കിംഗും പർച്ചേസും നടത്താനുള്ള തയ്യാറെടുപ്പിലാണ്. നിലവിലെ റിപ്പോർട്ടുകൾ പ്രകാരം ഐഫോൺ 17-ന് 70,990 രൂപയും, ഐഫോൺ 17 പ്രോയ്ക്ക് 1,12,900 രൂപയും, ഐഫോൺ 17 പ്രോ മാക്സിന് 1,27,900 രൂപയുമാണ് വിപണിയിൽ പ്രതീക്ഷിക്കുന്ന ഏകദേശ വില.
