ഇന്ത്യ: പെർഫോമൻസ് കാർ പ്രേമികൾക്ക് ആവേശമായി സ്കോഡ ഒക്ടാവിയ RS വീണ്ടും വിപണിയിലെത്തുന്നു. ഉത്സവ സീസൺ പ്രമാണിച്ച് ഈ പെർഫോമൻസ് സെഡാന്റെ രണ്ടാം ബാച്ച് ഇന്ത്യയിൽ അവതരിപ്പിക്കാനാണ് സ്കോഡയുടെ തീരുമാനം. പരിമിതമായ യൂണിറ്റുകൾ മാത്രമായിരിക്കും ഇത്തവണയും വിപണിയിൽ ലഭ്യമാവുക. കഴിഞ്ഞ വർഷം ഒക്ടോബറിൽ പുറത്തിറക്കിയ ആദ്യ ബാച്ചിലെ 100 യൂണിറ്റുകളും റെക്കോർഡ് വേഗത്തിലാണ് വിറ്റഴിഞ്ഞത്. പൂർണമായും വിദേശത്ത് നിർമിച്ച് ഇന്ത്യയിലേക്ക് ഇറക്കുമതി ചെയ്യുന്ന ഈ മോഡലിന് ഏകദേശം 63.93 ലക്ഷം രൂപയാണ് ഓൺ-റോഡ് വില.
പുതിയ ഒക്ടാവിയ RS മാംബ ഗ്രീൻ, വെൽവെറ്റ് റെഡ്, റേസ് ബ്ലൂ, മാജിക് ബ്ലാക്ക്, കാൻഡി വൈറ്റ് എന്നീ അഞ്ച് നിറങ്ങളിൽ ലഭ്യമാകും. ബട്ടർഫ്ളൈ ഫ്രണ്ട് ഗ്രിൽ, സ്പോർട്ടി ബമ്പറുകൾ, ഡ്യുവൽ എക്സ്ഹോസ്റ്റ്, ലിപ് സ്പോയിലർ, 18 ഇഞ്ച് അലോയ് വീലുകൾ എന്നിവയാണ് പുറംഭാഗത്തെ പ്രധാന ആകർഷണങ്ങൾ. ഉപഭോക്താക്കൾക്ക് 19 ഇഞ്ച് വീലുകളിലേക്ക് അപ്ഗ്രേഡ് ചെയ്യാനുള്ള സൗകര്യവും കമ്പനി ഒരുക്കുന്നുണ്ട്. റെഡ് കോൺട്രാസ്റ്റ് സ്റ്റിച്ചിങ്ങോടു കൂടിയ ലെതർ/സ്യൂഡിയ അപ്ഹോൾസ്റ്ററി, സ്പോർട്സ് സീറ്റുകൾ, മെമ്മറി-ഹീറ്റിംഗ്-മസാജ് ഫംഗ്ഷനുകൾ എന്നിവ അകത്തളത്തെ കൂടുതൽ പ്രീമിയമാക്കുന്നു.
സാങ്കേതികവിദ്യയിലും സുരക്ഷയിലും മികവ് പുലർത്തുന്ന കാറിൽ 12.9 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, 10 ഇഞ്ച് ഡിജിറ്റൽ ക്ലസ്റ്റർ, 11 സ്പീക്കർ കാന്റൺ സൗണ്ട് സിസ്റ്റം, ഹെഡ്-അപ്പ് ഡിസ്പ്ലേ എന്നിവ ഉൾപ്പെടുത്തിയിട്ടുണ്ട്. ലെവൽ 2 ADAS, 10 എയർബാഗുകൾ, അഡാപ്റ്റീവ് ക്രൂയിസ് കൺട്രോൾ, ഓട്ടോണമസ് എമർജൻസി ബ്രേക്കിംഗ്, ലെയ്ൻ അസിസ്റ്റ് തുടങ്ങി അത്യാധുനിക സുരക്ഷാ സംവിധാനങ്ങളും ഇതിലുണ്ട്. ഫോക്സ്വാഗൺ ഗ്രൂപ്പിന്റെ MQB Evo പ്ലാറ്റ്ഫോമിൽ നിർമിച്ചിരിക്കുന്ന ഈ സെഡാനിൽ 2.0 ലിറ്റർ EA888 ടർബോ പെട്രോൾ എഞ്ചിനാണ് കരുത്ത് പകരുന്നത്. 261 bhp കരുത്തും 370 Nm ടോർക്കും ഉത്പാദിപ്പിക്കുന്ന ഈ വാഹനം വെറും 6.4 സെക്കൻഡിൽ 100 കിലോമീറ്റർ വേഗത കൈവരിക്കുകയും മണിക്കൂറിൽ 250 കിലോമീറ്റർ പരമാവധി വേഗതയിൽ സഞ്ചരിക്കുകയും ചെയ്യും.
