ഗുരുവായൂർ: സംസ്ഥാനത്ത് സ്വർണവിലയിൽ തുടർച്ചയായ മാറ്റങ്ങൾ രേഖപ്പെടുത്തുന്നു. കഴിഞ്ഞ 24 ദിവസത്തിനിടെയുണ്ടായ വിലക്കയറ്റത്തിനൊടുവിൽ നിലവിൽ ഒരു പവൻ സ്വർണത്തിന് 1,06,280 രൂപയാണ് വിപണി വില. ഒരു ഗ്രാം സ്വർണത്തിന് 13,285 രൂപ നിരക്കിലാണ് വ്യാപാരം നടക്കുന്നത്. രാജ്യാന്തര വിപണിയിൽ ട്രോയ് ഔൺസിന് 4,052.88 ഡോളറാണ് സ്വർണത്തിന്റെ നിലവിലെ വിലനിലവാരം.
കഴിഞ്ഞയാഴ്ച സ്വർണ്ണത്തിന്റെയും വെള്ളിയുടെയും വിലയിൽ വലിയ ഇടിവ് പ്രകടമായിരുന്നുവെങ്കിലും പിന്നീട് സ്വർണവിലയിൽ തിരിച്ചുകയറ്റം ഉണ്ടായി. നിലവിൽ എംസിഎക്സിൽ 10 ഗ്രാം സ്വർണ്ണത്തിന്റെ വില 1.50 ലക്ഷം രൂപയ്ക്ക് താഴെയാണ് തുടരുന്നത്. അതേസമയം, വെള്ളിയുടെ വിലയിലും ഇടിവ് രേഖപ്പെടുത്തിയിട്ടുണ്ട്; വെള്ളി വില 2.33 ലക്ഷം രൂപയ്ക്ക് താഴേക്ക് എത്തിയിരിക്കുന്നു. ആഗോളതലത്തിൽ സ്പോട്ട് ഗോൾഡ് വില രണ്ട് ശതമാനം കുറഞ്ഞ് ഔൺസിന് 4,680 ഡോളറിൽ താഴെയായിട്ടുണ്ട്. സ്പോട്ട് വെള്ളി വില ഔൺസിന് 73 ഡോളറിനടുത്ത് നേരിയ ഇടിവോടെയാണ് വ്യാപാരം അവസാനിപ്പിച്ചത്.
അന്താരാഷ്ട്ര വിപണിയിലെ ക്രൂഡ് ഓയിൽ വിലയിലുണ്ടായ കുതിച്ചുചാട്ടം വിപണിയെ കാര്യമായി സ്വാധീനിക്കുന്നുണ്ട്. കഴിഞ്ഞ വെള്ളിയാഴ്ച ക്രൂഡ് ഓയിൽ വില 11.4 ശതമാനം ഉയർന്ന് ബാരലിന് 111.54 ഡോളറിലെത്തി. ബ്രെന്റ് ക്രൂഡ് ഏകദേശം എട്ട് ശതമാനം ഉയർന്ന് 109 ഡോളറിന് മുകളിലാണ് ക്ലോസ് ചെയ്തത്. പ്രതീക്ഷിച്ചതിലും ശക്തമായ യുഎസ് തൊഴിൽ ഡാറ്റ പുറത്തുവന്നതോടെ യുഎസ് ഡോളർ 100 മാർക്കിന് മുകളിൽ സ്ഥാനം പിടിച്ചിട്ടുണ്ട്. യുഎസ് ഫെഡ് പലിശ നിരക്കുകൾ ഉയർത്തി നിലനിർത്തുമെന്ന സൂചനകളും ഡോളറിന്റെ കരുത്തും ക്രൂഡ് ഓയിൽ വിലയിലെ വർധനവുമാണ് സ്വർണവിലയിലെ മാറ്റങ്ങൾക്ക് പ്രധാന കാരണമായി സാമ്പത്തിക വിദഗ്ധർ വിലയിരുത്തുന്നത്.
