ബ്യൂണസ് ഐറിസ്: ഫുട്ബോള് ലോകത്തെ അമ്പരപ്പിച്ചു കൊണ്ട് വിരമിക്കലിനെക്കുറിച്ചുള്ള സൂചനകളുമായി അര്ജന്റീന ഇതിഹാസം ലയണല് മെസ്സി. പിതാവ് ഹോര്ഹെ മെസ്സിയുടെ വിയോഗത്തിന് പിന്നാലെ ഇന്സ്റ്റഗ്രാമില് പങ്കുവെച്ച വൈകാരിക കുറിപ്പിലൂടെയാണ് തന്റെ കായിക ജീവിതത്തിന്റെ ഭാവിയെക്കുറിച്ച് താരം മനസ്സ് തുറന്നത്. അധികകാലം കൂടി ഫുട്ബോള് മൈതാനത്ത് തുടരാനാകുമോ എന്ന കാര്യത്തില് തനിക്ക് തന്നെ സംശയമുണ്ടെന്ന് 39 കാരനായ മെസ്സി വ്യക്തമാക്കി.
തന്റെ ജീവിതയാത്രയിലെ കരുത്തായിരുന്ന പിതാവിന്റെ വേര്പാട് വലിയ ശൂന്യതയാണ് സൃഷ്ടിച്ചതെന്ന് മെസ്സി കുറിച്ചു. അവസാന ലോകകപ്പില് മകനെ കാണണമെന്നത് പിതാവിന്റെ വലിയ ആഗ്രഹമായിരുന്നു. ലോകകപ്പിനിടെ പിതാവിന്റെ ആരോഗ്യനില മോശമായിരുന്നെങ്കിലും പരമാവധി മുന്നേറാനാണ് താന് ശ്രമിച്ചത്. എന്നാല്, ടൂര്ണമെന്റിന്റെ അവസാന ഘട്ടമായപ്പോഴേക്കും ശാരീരികമായും മാനസികമായും ഏറെ തളര്ന്നിരുന്നുവെന്നും അദ്ദേഹം കൂട്ടിച്ചേര്ത്തു. ജീവിതത്തിന്റെ തുടക്കം മുതല് തന്റെ കരിയറിന് താങ്ങായി നിന്നത് ഹോര്ഹെ മെസ്സിയായിരുന്നു. പതിമൂന്നാം വയസ്സില് ബാഴ്സലോണയിലേക്ക് ചേക്കേറിയ കാലം മുതല് സ്പെയിനിലും അദ്ദേഹത്തിന്റെ സാമീപ്യം തനിക്ക് വലിയ പിന്തുണയായിരുന്നുവെന്നും താരം അനുസ്മരിച്ചു.
മെസ്സിയുടെ കുറിപ്പ് പുറത്തുവന്നതോടെ താരം ഉടന് വിരമിക്കുമെന്ന ചര്ച്ചകള് ഫുട്ബോള് ലോകത്ത് സജീവമായിട്ടുണ്ട്. എങ്കിലും, വിരമിക്കലിനെക്കുറിച്ച് ഔദ്യോഗികമായ പ്രഖ്യാപനം മെസ്സി നടത്തിയിട്ടില്ല. തന്റെ കരിയറിലെ ഏറ്റവും നിര്ണായക വ്യക്തിത്വമായിരുന്ന പിതാവിന്റെ വിയോഗത്തെത്തുടര്ന്നുണ്ടായ മാനസികാഘാതമാണ് ഇത്തരമൊരു ചിന്തയ്ക്ക് പിന്നിലെന്നാണ് വിലയിരുത്തപ്പെടുന്നത്. ഇതിനിടെ, മെസ്സിക്ക് പിന്തുണയുമായി സഹതാരങ്ങളും ക്രിസ്റ്റ്യാനോ റൊണാള്ഡോ അടക്കമുള്ള ഫുട്ബോള് പ്രമുഖരും രംഗത്തെത്തിയിട്ടുണ്ട്.
