ന്യൂഡൽഹി: ബിഎസ്എൻഎൽ പുതിയ സാറ്റലൈറ്റ് ഫോൺ വിപണിയിൽ അവതരിപ്പിക്കുന്നു. മൊബൈൽ ടവറുകളുടെ സഹായമില്ലാതെ തന്നെ തടസ്സമില്ലാതെ കോളുകൾ ചെയ്യാനും സ്വീകരിക്കാനും സാധിക്കും എന്നതാണ് ഈ ഫോണിന്റെ പ്രധാന പ്രത്യേകത. എക്സിൽ പങ്കുവെച്ച പോസ്റ്റിലൂടെയാണ് ബിഎസ്എൻഎൽ പുതിയ സാങ്കേതികവിദ്യയുടെ വിവരങ്ങൾ പുറത്തുവിട്ടത്. 1.34 ലക്ഷം രൂപയാണ് ഈ ഫോണിന്റെ വിപണി വില.
മൊബൈൽ നെറ്റ്വർക്ക് ലഭ്യമല്ലാത്ത വിദൂര പ്രദേശങ്ങളിലും വെല്ലുവിളി നിറഞ്ഞ സാഹചര്യങ്ങളിലും വോയ്സ് കോളുകൾ ഉറപ്പാക്കുന്നതിനാണ് ഈ ഫോൺ രൂപകൽപ്പന ചെയ്തിരിക്കുന്നത്. പ്രതിരോധ മേഖല, നാവികസേന, ദുരന്ത നിവാരണ പ്രവർത്തനങ്ങൾ, സാഹസിക യാത്രകൾ തുടങ്ങിയ ആവശ്യങ്ങൾക്കായി ഈ ഉപകരണം പ്രയോജനപ്പെടുത്താം. സാധാരണ മൊബൈൽ ഫോണുകളിൽ നിന്ന് വ്യത്യസ്തമായി, സെല്ലുലാർ ടവറുകളെ ആശ്രയിക്കാതെ നേരിട്ട് സാറ്റലൈറ്റുകളുമായി ബന്ധിപ്പിച്ചാണ് ഈ ഫോൺ പ്രവർത്തിക്കുന്നത്.
മികച്ച സാറ്റലൈറ്റ് കണക്റ്റിവിറ്റിയും ദീർഘനേരം നിലനിൽക്കുന്ന ബാറ്ററി ലൈഫും ഇതിന്റെ സവിശേഷതയാണ്. മൊബൈൽ നെറ്റ്വർക്കുകൾ ഒട്ടും ലഭ്യമല്ലാത്ത സ്ഥലങ്ങളിൽ ആശയവിനിമയം സുഗമമാക്കാൻ ഈ സാങ്കേതികവിദ്യ സഹായിക്കും. സാറ്റലൈറ്റ് അധിഷ്ഠിത സേവനമായതിനാൽ ഏത് പ്രതികൂല സാഹചര്യത്തിലും മികച്ച സേവനം ലഭ്യമാക്കാൻ കഴിയുമെന്നതാണ് ഉപയോക്താക്കൾക്ക് ലഭിക്കുന്ന പ്രധാന നേട്ടം.
