ആഗോള വിപണി: ക്രിപ്റ്റോ കറൻസി വിപണിയിൽ കനത്ത ഇടിവ് തുടരുന്നത് നിക്ഷേപകരിൽ ആശങ്ക പടർത്തുന്നു. പ്രമുഖ ഡിജിറ്റൽ കറൻസിയായ ബിറ്റ്കോയിന്റെ മൂല്യം 60,000 ഡോളറിൽ താഴേക്ക് പതിച്ചത് വിപണിയുടെ ആത്മവിശ്വാസത്തെ കാര്യമായി ബാധിച്ചിട്ടുണ്ട്. പ്രതികൂല സാഹചര്യങ്ങൾക്കിടയിലും ദീർഘകാല നിക്ഷേപകർക്ക് ഇതൊരു അവസരമാണെന്ന് സാമ്പത്തിക വിദഗ്ധർ വിലയിരുത്തുമ്പോഴും, പെട്ടെന്നുള്ള ഈ വിലത്തകർച്ച വലിയ ചർച്ചകൾക്കാണ് വഴിവെച്ചിരിക്കുന്നത്.
ബിറ്റ്കോയിന്റെ പ്രമുഖ കോർപ്പറേറ്റ് ഉടമസ്ഥരായ സ്ട്രാറ്റജി വലിയ തോതിൽ ബിറ്റ്കോയിൻ വിറ്റഴിച്ചതാണ് വിപണിയിലെ തകർച്ചയ്ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്. 2026 മെയ് അവസാന വാരത്തിൽ ഏകദേശം 250 കോടി ഡോളർ മൂല്യമുള്ള 32 ബിറ്റ്കോയിനുകളാണ് കമ്പനി വിറ്റഴിച്ചത്. തങ്ങളുടെ പ്രിഫേർഡ് സ്റ്റോക്ക് ഡിവിഡന്റ് പേയ്മെന്റുകൾക്ക് ഫണ്ട് കണ്ടെത്തുന്നതിനായുള്ള ഈ നടപടി, 2022 ഡിസംബറിന് ശേഷമുള്ള കമ്പനിയുടെ ഏറ്റവും വലിയ വിൽപനയാണ്. കോർപ്പറേറ്റ് ഭീമന്മാർ ബിറ്റ്കോയിൻ പോലുള്ള ക്രിപ്റ്റോ ആസ്തികൾ വിൽക്കില്ലെന്ന വിപണിയുടെ പൊതുധാരണയെ ഈ നീക്കം തിരുത്തിക്കുറിച്ചു.
ബിറ്റ്കോയിന് പുറമെ എഥേറിയം, എക്സ്ആർപി തുടങ്ങിയ പ്രമുഖ ക്രിപ്റ്റോ കറൻസികളിലും വലിയ ഇടിവാണ് പ്രകടമാകുന്നത്. ഇന്നലെ മാത്രം ബിറ്റ്കോയിൻ 6.61 ശതമാനവും, എഥേറിയം 11.88 ശതമാനം ഇടിഞ്ഞ് 1,557 ഡോളറിലേക്കും, എക്സ്ആർപി 7.50 ശതമാനം ഇടിഞ്ഞ് 1.08 ഡോളറിലേക്കും കൂപ്പുകുത്തി. 2025 ഒക്ടോബറിൽ 1.26 ലക്ഷം ഡോളർ എന്ന റെക്കോർഡ് നിലവാരത്തിൽ എത്തിയിരുന്ന ബിറ്റ്കോയിൻ മൂല്യം, പിന്നീട് വലിയ ഇടിവാണ് രേഖപ്പെടുത്തിയത്. തുടർച്ചയായ വിലയിടിവ് ക്രിപ്റ്റോ വിപണിയുടെ ഭാവി സംബന്ധിച്ച ആശങ്കകൾക്ക് ആക്കം കൂട്ടിയിട്ടുണ്ട്.
