മുംബൈ: ചൊവ്വാഴ്ചത്തെ വ്യാപാരത്തിനൊടുവില് ഇന്ത്യന് ഓഹരി വിപണി നേരിയ നഷ്ടത്തോടെ വ്യാപാരം അവസാനിപ്പിച്ചു. ബിഎസ്ഇ സെന്സെക്സ് 238 പോയിന്റ് ഇടിഞ്ഞ് 77,470 ലും, എന്എസ്ഇ നിഫ്റ്റി 50 സൂചിക 51 പോയിന്റ് നഷ്ടത്തില് 24,187.70 എന്ന നിലവാരത്തിലുമാണ് ക്ലോസ് ചെയ്തത്. നിഫ്റ്റി നിര്ണ്ണായകമായ 24,200 മാര്ക്കിന് താഴെയാണ് നിലയുറപ്പിച്ചിരിക്കുന്നത്. ആഗോള സാമ്പത്തിക രംഗത്തെ അനിശ്ചിതത്വങ്ങള്, ഉയര്ന്ന ബ്രെന്റ് ക്രൂഡ് ഓയില് വില, ഒന്നാം പാദ സാമ്പത്തിക ഫലങ്ങളുടെ പ്രഖ്യാപനം എന്നിവ നിക്ഷേപകരെ ജാഗ്രതയോടെ വിപണിയെ സമീപിക്കാന് പ്രേരിപ്പിച്ചു.
പ്രധാന സൂചികകളില് മന്ദഗതി പ്രകടമാണെങ്കിലും പൊതുവിപണിയില് പോസിറ്റീവ് താല്പര്യം തുടരുന്നുണ്ട്. ദേശീയ സ്റ്റോക്ക് എക്സ്ചേഞ്ചില് 2,087 ഓഹരികള് നേട്ടമുണ്ടാക്കിയപ്പോള് 1,942 ഓഹരികള് ഇടിവും 180 ഓഹരികള് മാറ്റമില്ലാതെയും തുടര്ന്നു. ബെഞ്ച്മാര്ക്ക് സൂചികകളെ അപേക്ഷിച്ച് മിഡ്ക്യാപ്, സ്മോള്ക്യാപ് സൂചികകള് മികച്ച പ്രകടനമാണ് കാഴ്ചവെച്ചത്; യഥാക്രമം 0.3 ശതമാനവും 0.5 ശതമാനവും നേട്ടം രേഖപ്പെടുത്താന് ഇവയ്ക്ക് സാധിച്ചു. നിഫ്റ്റി ഐടി, പിഎസ് യു ബാങ്ക് സൂചികകള് ഒരു ശതമാനത്തോളം ഇടിഞ്ഞപ്പോള് റിയല്റ്റി, ഓട്ടോ സൂചികകള് മികച്ച മുന്നേറ്റം നടത്തി വിപണിക്ക് താങ്ങായി.
സാങ്കേതികമായി നോക്കുമ്പോള്, നിഫ്റ്റി 50 നിലവില് 24,188 എന്ന നിലവാരത്തില് കണ്സോളിഡേഷന് ഘട്ടത്തിലാണ്. 24,373-24,451 എന്ന മേഖല കടുത്ത റെസിസ്റ്റന്സായി തുടരുന്നുണ്ടെങ്കിലും, 24,100-24,000 സപ്പോര്ട്ട് മേഖലയ്ക്ക് മുകളില് സൂചിക നിലനില്ക്കുന്നിടത്തോളം വിപണി പോസിറ്റീവ് ബയസോടെയുള്ള റേഞ്ച്-ബൗണ്ട് അവസ്ഥയില് തുടരും. അദാനി എനര്ജി സൊല്യൂഷന്സ്, ടിവിഎസ് മോട്ടാര് കമ്പനി തുടങ്ങിയവ മികച്ച പാദഫലങ്ങളുടെ പിന്ബലത്തില് ഓഹരി വിപണിയില് ശ്രദ്ധേയമായ നേട്ടം കൈവരിച്ചു. വരും ദിവസങ്ങളില് ഭൗമരാഷ്ട്രീയ സംഭവവികാസങ്ങളും കോര്പ്പറേറ്റ് ഫലങ്ങളും വിപണിയുടെ ദിശ നിശ്ചയിക്കുന്നതില് നിര്ണ്ണായകമാകും.
