ന്യൂഡൽഹി: ആഗോളതലത്തിൽ ശ്രദ്ധേയമായ അൾട്രാ ലക്ഷ്വറി ഇലക്ട്രിക് കാർ റോൾസ് റോയ്സ് സ്പെക്ടർ സീരീസ് II ഇന്ത്യൻ വിപണിയിലും അവതരിപ്പിക്കാൻ ഒരുങ്ങുന്നു. ആഗോളതലത്തിൽ ഇതിനോടകം തന്നെ ലോഞ്ച് ചെയ്ത ഈ മോഡൽ, 2027-ന്റെ തുടക്കത്തോടെ ഇന്ത്യയിലെ റോഡുകളിലെത്തുമെന്നാണ് പ്രതീക്ഷിക്കുന്നത്. ഔദ്യോഗിക ലോഞ്ച് തീയതി സംബന്ധിച്ച വിവരങ്ങൾ കമ്പനി ഉടൻ പ്രഖ്യാപിക്കും. എട്ടു കോടി രൂപയ്ക്ക് മുകളിൽ പ്രാരംഭ വില പ്രതീക്ഷിക്കുന്ന ഈ വാഹനം അതിസമ്പന്നരുടെ ഗാരേജുകളിൽ വലിയ കൗതുകം പകരുമെന്നുറപ്പാണ്.
ഏറ്റവും പുതിയ സാങ്കേതികവിദ്യകളും അത്യാധുനിക സൗകര്യങ്ങളും ഉൾക്കൊള്ളിച്ചാണ് സ്പെക്ടർ സീരീസ് II വിപണിയിലെത്തുന്നത്. 102 കെഡബ്ല്യുഎച്ച് ബാറ്ററിയാണ് വാഹനത്തിന് കരുത്തേകുന്നത്. ഇത് ഒറ്റച്ചാർജിൽ 628 കിലോമീറ്റർ വരെ റേഞ്ച് വാഗ്ദാനം ചെയ്യുന്നു. പഴയ മോഡലുകളെ അപേക്ഷിച്ച് 18 ശതമാനം അധിക കാര്യക്ഷമതയും, ചാർജിംഗ് സമയത്തിൽ 14 ശതമാനം കുറവും പുതിയ സീരീസ് വാഗ്ദാനം ചെയ്യുന്നു. ഡ്യുവൽ മോട്ടോർ ഡ്രൈവ്ട്രെയിൻ വഴി 671 ബിഎച്ച്പി വരെ കരുത്ത് പുറത്തെടുക്കാൻ ഈ ഇലക്ട്രിക് വാഹനത്തിന് സാധിക്കും.
രൂപകൽപ്പനയിലും ഈ വാഹനം അതീവ ശ്രദ്ധ പുലർത്തുന്നു. സിഗ്നേച്ചർ റേഡിയൻസ് ഗ്രിൽ, ബോൾഡ് സ്പ്ലിറ്റ് ഹെഡ്ലൈറ്റ് ഡിസൈൻ, എതെറിയൽ ബ്ലൂ നിറം എന്നിവ വാഹനത്തിന് പ്രീമിയം ലുക്ക് നൽകുന്നു. ഉൾഭാഗത്ത് 8,000-ത്തിലധികം പിക്സലുകൾ ഉൾക്കൊള്ളുന്ന ലൈറ്റ് ഫീച്ചറുകളോടുകൂടിയ ഡാഷ്ബോർഡും, 23 ഇഞ്ച് അലോയ് വീലുകളും വാഹനത്തിന്റെ പ്രത്യേകതകളാണ്. ബ്ലാക്ക് ബാഡ്ജ് വേരിയന്റുകളിൽ ഐസ്ഡ് മാറ്റ് ബ്ലാക്ക് ഫിനിഷും ലഭ്യമാണ്. ബേസ് മോഡലിന് 7.50 കോടി രൂപ മുതൽ വില ആരംഭിക്കുമ്പോൾ, ടോപ്പ് എൻഡ് മോഡലുകൾക്ക് 9.50 കോടി രൂപ വരെ വില ഉയർന്നേക്കും.
