ഗുരുവായൂർ: അഡ്വഞ്ചർ മോട്ടോർസൈക്കിൾ പ്രേമികൾക്കായി കുഞ്ഞൻ അഡ്വഞ്ചർ ബൈക്കുകളുമായി ഹോണ്ട വിപണിയിലേക്ക് എത്തുന്നു. എക്സ്ആർ300 (XR300), എക്സ്ആർ300എൽ (XR300L) എന്നീ മോഡലുകളാണ് കമ്പനി പുതിയതായി അവതരിപ്പിക്കാൻ ഒരുങ്ങുന്നത്. ഹോണ്ടയുടെ ആഗോളതലത്തിലുള്ള ഡ്യുവൽ-സ്പോർട്സ് മോട്ടോർസൈക്കിൾ നിരയിൽ നിന്ന് വ്യത്യസ്തമായ ഡിസൈനും ഫീച്ചറുകളുമായാണ് ഈ മോഡലുകൾ വിപണിയിലെത്തുന്നത്. പുതിയ ബൈക്കുകളുടെ പൂർണ്ണമായ സാങ്കേതിക വിവരങ്ങൾ ഹോണ്ട ഔദ്യോഗികമായി പുറത്തുവിട്ടിട്ടില്ലെങ്കിലും, മികച്ച പെർഫോമൻസ് ഉറപ്പുവരുത്തുന്ന എഞ്ചിൻ ഉൾപ്പെടെയുള്ള ഫീച്ചറുകൾ ഇവയിൽ പ്രതീക്ഷിക്കാം.
ഈ മോട്ടോർസൈക്കിളുകളുടെ എഞ്ചിൻ സംവിധാനം ഹോണ്ടയുടെ തന്നെ സിബി300എഫ് (CB300F) മോഡലുമായി സാമ്യമുള്ളതായിരിക്കുമെന്നാണ് സൂചന. ഇന്ത്യൻ നിരത്തുകളുടെയും റൈഡിംഗ് സാഹചര്യങ്ങളുടെയും പ്രത്യേകതകൾ കണക്കിലെടുത്ത് രൂപകൽപ്പന ചെയ്തിരിക്കുന്ന ഈ ബൈക്കുകൾ കാഴ്ചയിൽ കോംപാക്റ്റ് ആണ്. ബ്രസീൽ, കൊളംബിയ തുടങ്ങിയ തെക്കേ അമേരിക്കൻ വിപണികളിൽ ഹോണ്ട ഇതിനകം തന്നെ XR300L വിൽക്കുന്നുണ്ട്. ഇതേ മോട്ടോർ ഇന്ത്യൻ പതിപ്പിലും ഉപയോഗിക്കുകയാണെങ്കിൽ, 7,500 ആർപിഎമ്മിൽ 24.3 എച്ച്പി കരുത്തും 5,750 ആർപിഎമ്മിൽ 26.5 എൻഎം ടോർക്കും ഉത്പാദിപ്പിക്കാൻ ഈ എഞ്ചിന് സാധിക്കും.
ബ്രസീലിയൻ വിപണിയിലെ മോഡലുകൾ ഫ്ലെക്സ് ഇന്ധനത്തിന് അനുയോജ്യമായ രീതിയിലാണ് നിർമ്മിച്ചിരിക്കുന്നത്, ഇത് പെട്രോളിലോ എഥനോളിലോ പ്രവർത്തിക്കാൻ വാഹനത്തെ സഹായിക്കുന്നു. ഇന്ത്യൻ പതിപ്പിലും ഇത്തരമൊരു ശേഷി ലഭിക്കുമോ എന്നത് സംബന്ധിച്ച് ഹോണ്ട നിലവിൽ സ്ഥിരീകരണം നൽകിയിട്ടില്ല. എങ്കിലും, ഇന്ത്യയിൽ എഥനോൾ കലർന്ന ഇന്ധനങ്ങളുടെ ഉപയോഗം വർധിച്ചുവരുന്ന സാഹചര്യത്തിൽ ഈ സാങ്കേതികവിദ്യ വിപണിയിൽ വലിയ ഗുണം ചെയ്യും. തെക്കേ അമേരിക്കൻ മോഡലുകൾ യൂറോ 3 എമിഷൻ മാനദണ്ഡങ്ങൾ പാലിക്കുന്നവയാണ്. ഇന്ത്യൻ വിപണിയിലെത്തുമ്പോൾ ബോഡി വർക്കുകളിലും മറ്റും ചെറിയ മാറ്റങ്ങൾ വരുത്തിക്കൊണ്ടുള്ള ഒരു പതിപ്പായിരിക്കും ഹോണ്ട അവതരിപ്പിക്കുക.
