ടെക്സാസ്: മനുഷ്യനെ ചന്ദ്രനിലേക്കും ചൊവ്വയിലേക്കും എത്തിക്കാനുള്ള ദൗത്യത്തിൽ നിർണായക ചുവടുവെപ്പായി സ്പേസ് എക്സിന്റെ സ്റ്റാർഷിപ്പ് ഫ്ലൈറ്റ് 13 പരീക്ഷണ വിക്ഷേപണം വിജയകരമായി പൂർത്തിയായി. ഇന്ത്യൻ സമയം ശനിയാഴ്ച പുലർച്ചെ 4.21-ന് ടെക്സാസിലെ ബോകാ ചിക്കയിലുള്ള സ്റ്റാർബേസിൽ നിന്നാണ് ലോകത്തിലെ ഏറ്റവും ഉയരവും കരുത്തുമുള്ള റോക്കറ്റ് കുതിച്ചുയർന്നത്. എഞ്ചിൻ സ്റ്റാർട്ടപ്പ് തകരാറിനെ തുടർന്ന് നേരത്തെ മാറ്റിവെച്ച വിക്ഷേപണശ്രമത്തിന് ശേഷമാണ് ദൗത്യം വിജയകരമായി പൂർത്തിയാക്കാൻ സാധിച്ചത്.
ഈ പരീക്ഷണ പറക്കലിലൂടെ അടുത്ത തലമുറയിലെ 20 സ്റ്റാർലിങ്ക് വേർഷൻ-3 ഉപഗ്രഹങ്ങളെ ബഹിരാകാശത്തേക്ക് എത്തിക്കുന്നതിനൊപ്പം, ഭാവിയിലെ വാണിജ്യ ദൗത്യങ്ങൾക്ക് ആവശ്യമായ വിവിധ സാങ്കേതിക സംവിധാനങ്ങളും സ്പേസ് എക്സ് പരീക്ഷിച്ചു. വിക്ഷേപണത്തിന് രണ്ട് മിനിറ്റിലധികം കഴിഞ്ഞപ്പോൾ റോക്കറ്റിന്റെ ആദ്യഘട്ട ബൂസ്റ്റർ സ്റ്റാർഷിപ്പ് പേടകത്തിൽ നിന്ന് വിജയകരമായി വേർപെട്ടു. തുടർന്ന് ബൂസ്റ്റർ മെക്സിക്കോ ഉൾക്കടലിൽ നിയന്ത്രിതമായി പതിക്കാൻ ശ്രമം നടത്തിയെങ്കിലും, ലാൻഡിംഗ് ഘട്ടത്തിൽ റാപ്റ്റർ എഞ്ചിനുകൾ പൂർണമായി പ്രവർത്തിക്കാത്തതിനാൽ നിയന്ത്രിത സോഫ്റ്റ് സ്പ്ലാഷ്ഡൗൺ സാധ്യമായില്ല.
അതേസമയം, സ്റ്റാർഷിപ്പ് ബഹിരാകാശയാനം നിശ്ചിത ഉയരത്തിലെത്തി എഞ്ചിനുകൾ നിർത്തി കോസ്റ്റിംഗ് ഘട്ടത്തിലേക്ക് പ്രവേശിച്ചു. ഈ സമയത്താണ് 20 സ്റ്റാർലിങ്ക് ഉപഗ്രഹങ്ങളെ വിജയകരമായി വിന്യസിച്ചത്. ഉപഗ്രഹങ്ങൾ സോളാർ പാനലുകൾ തുറക്കുകയും ബഹിരാകാശ ലേസർ ആശയവിനിമയ സംവിധാനങ്ങൾ പ്രവർത്തനസജ്ജമാക്കുകയും ചെയ്തു. വിക്ഷേപണത്തിന് ഒരു മണിക്കൂറിലധികം കഴിഞ്ഞ് സ്റ്റാർഷിപ്പ് ഭൂമിയുടെ അന്തരീക്ഷത്തിലേക്ക് തിരിച്ചിറങ്ങി, ഇന്ത്യൻ മഹാസമുദ്രത്തിൽ നിശ്ചിത രീതിയിൽ സ്പ്ലാഷ്ഡൗൺ പൂർത്തിയാക്കി. സ്റ്റാർഷിപ്പിനെ പൂർണമായും പുനരുപയോഗിക്കാവുന്ന വിക്ഷേപണ വാഹനമാക്കി മാറ്റുന്നതിനുള്ള നിർണായക ഘട്ടമായാണ് ഈ ദൗത്യത്തെ വിലയിരുത്തുന്നത്. ദൗത്യത്തിനിടെ ശേഖരിച്ച ബൂസ്റ്ററിന്റെ പ്രകടനം, ഉപഗ്രഹ വിന്യാസം, അന്തരീക്ഷത്തിലേക്കുള്ള തിരിച്ചിറക്കം എന്നിവയുമായി ബന്ധപ്പെട്ട വിവരങ്ങൾ വിശദമായി വിശകലനം ചെയ്യുമെന്ന് സ്പേസ് എക്സ് അധികൃതർ അറിയിച്ചു.
