കല്പറ്റ: ജില്ലയില് ശക്തമായ മഴ തുടരുന്ന സാഹചര്യത്തില് വയനാട്ടിലെ എല്ലാ വിദ്യാഭ്യാസ സ്ഥാപനങ്ങള്ക്കും നാളെ ജില്ലാ കളക്ടര് അവധി പ്രഖ്യാപിച്ചു. കേന്ദ്ര കാലാവസ്ഥാ വകുപ്പ് ജില്ലയില് ഓറഞ്ച് അലര്ട്ട് പ്രഖ്യാപിച്ചതിനെത്തുടര്ന്ന് മുന്കരുതല് നടപടിയായാണ് അവധി പ്രഖ്യാപിച്ചിരിക്കുന്നത്.
അങ്കണവാടികള്, സ്കൂളുകള്, മതപഠന കേന്ദ്രങ്ങള്, ട്യൂഷന് സെന്ററുകള്, സ്പെഷ്യല് ക്ലാസുകള്, പ്രൊഫഷണല് കോളേജുകള് എന്നിവയുള്പ്പെടെ ജില്ലയിലെ എല്ലാ വിദ്യാഭ്യാസ സ്ഥാപനങ്ങള്ക്കും ഈ ഉത്തരവ് ബാധകമായിരിക്കും. എന്നാല്, റസിഡന്ഷ്യല് സ്കൂളുകള്ക്കും റസിഡന്ഷ്യല് കോളേജുകള്ക്കും ഈ അവധി ബാധകമല്ലെന്ന് ജില്ലാ കളക്ടര് വ്യക്തമാക്കിയിട്ടുണ്ട്.
ജില്ലയില് വരും ദിവസങ്ങളിലും ശക്തമായ മഴയ്ക്ക് സാധ്യതയുള്ളതിനാല് പൊതുജനങ്ങളും വിദ്യാര്ഥികളും അതീവ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദേശിച്ചു. മലയോര മേഖലകളിലേക്കുള്ള യാത്രകള് ഒഴിവാക്കണമെന്നും അധികൃതര് മുന്നറിയിപ്പ് നല്കുന്നു.
