തൃശൂർ: കനത്ത മഴ തുടരുന്ന സാഹചര്യത്തിലും ജലനിരപ്പ് ഉയരുന്ന പശ്ചാത്തലത്തിലും ജില്ലയിലെ പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും നാളെ ജില്ലാ കളക്ടർ അവധി പ്രഖ്യാപിച്ചു. സർക്കാർ, എയ്ഡഡ്, അൺഎയ്ഡഡ്, സിബിഎസ്ഇ, ഐസിഎസ്ഇ സ്കൂളുകൾ, കേന്ദ്രീയ വിദ്യാലയങ്ങൾ, അങ്കണവാടികൾ, മദ്രസകൾ, ട്യൂഷൻ സെന്ററുകൾ എന്നിവയ്ക്കും അവധി ബാധകമായിരിക്കും.
വിവിധ താലൂക്കുകളിൽ നിന്ന് ലഭിച്ച റിപ്പോർട്ടുകൾ, ജില്ലയിലെ ഡാമുകളിലെയും ജലാശയങ്ങളിലെയും ജലനിരപ്പ്, തുടരുന്ന ശക്തമായ മഴ എന്നിവ വിലയിരുത്തിയ ശേഷമാണ് വിദ്യാർഥികളുടെ സുരക്ഷ മുൻനിർത്തി അവധി പ്രഖ്യാപിച്ചതെന്ന് ജില്ലാ കളക്ടർ വ്യക്തമാക്കി. അതേസമയം, മുൻകൂട്ടി നിശ്ചയിച്ചിട്ടുള്ള പൊതുപരീക്ഷകൾക്കും അഭിമുഖങ്ങൾക്കും ഈ അവധി ബാധകമല്ലെന്ന് അധികൃതർ അറിയിച്ചു.
മഴ ശക്തമായി തുടരുന്ന സാഹചര്യത്തിൽ പൊതുജനങ്ങൾ അതീവ ജാഗ്രത പാലിക്കണമെന്ന് ജില്ലാ ഭരണകൂടം നിർദ്ദേശിച്ചു. അനാവശ്യ യാത്രകൾ പൂർണ്ണമായും ഒഴിവാക്കുകയും ദുരന്തനിവാരണ വകുപ്പും ജില്ലാ ഭരണകൂടവും നൽകുന്ന ഔദ്യോഗിക മുന്നറിയിപ്പുകളും നിർദ്ദേശങ്ങളും കർശനമായി പാലിക്കണമെന്നും ജില്ലാ കളക്ടർ പൊതുജനങ്ങളോട് അഭ്യർത്ഥിച്ചു.
