ഗാൾ: 1932 ജൂൺ 25-ന് ലോർഡ്സിൽ സി.കെ. നായിഡുവിന്റെ നേതൃത്വത്തിൽ ഇംഗ്ലണ്ടിനെതിരേ അരങ്ങേറ്റം കുറിച്ച ഇന്ത്യൻ ക്രിക്കറ്റ് ടീം ചരിത്രത്തിലെ 600-ാം ടെസ്റ്റ് മത്സരത്തിനിറങ്ങുന്നു. ശ്രീലങ്കയ്ക്കെതിരായ ഒന്നാം ടെസ്റ്റിനായി ഗാൾ അന്താരാഷ്ട്ര സ്റ്റേഡിയത്തിൽ ശുഭ്മാൻ ഗില്ലിന്റെ നേതൃത്വത്തിൽ ഇന്ത്യ കളത്തിലിറങ്ങുമ്പോൾ, ഇംഗ്ലണ്ടിനും ഓസ്ട്രേലിയക്കും ശേഷം 600 ടെസ്റ്റ് മത്സരങ്ങൾ പൂർത്തിയാക്കുന്ന ലോകത്തിലെ മൂന്നാമത്തെ ടീമെന്ന നേട്ടമാണ് ഇന്ത്യ സ്വന്തമാക്കുന്നത്.
94 വർഷത്തെ ടെസ്റ്റ് ചരിത്രത്തിനിടെ 319 താരങ്ങളാണ് ഇന്ത്യക്കായി ടെസ്റ്റ് കുപ്പായമണിഞ്ഞത്. 200 ടെസ്റ്റുകൾ കളിച്ച സച്ചിൻ ടെണ്ടുൽക്കറാണ് ഏറ്റവും കൂടുതൽ മത്സരങ്ങളിൽ പങ്കെടുത്ത താരം. നിലവിലെ ടീമിലെ മാനവ് സുതറാണ് ഈ പട്ടികയിൽ ഇടംപിടിച്ച ഏറ്റവും പുതിയ താരം. ഇതുവരെ 38 ക്യാപ്റ്റൻമാരാണ് ഇന്ത്യയെ ടെസ്റ്റിൽ നയിച്ചിട്ടുള്ളത്. 2014 മുതൽ 2022 വരെ 68 ടെസ്റ്റുകളിൽ ടീമിനെ നയിച്ച വിരാട് കോഹ്ലിയാണ് ഇന്ത്യയുടെ ഏറ്റവും വിജയകരമായ ക്യാപ്റ്റൻ. അദ്ദേഹത്തിന്റെ നേതൃത്വത്തിൽ 40 വിജയങ്ങളാണ് ടീം നേടിയത്.
ഇന്ത്യയുടെ ടെസ്റ്റ് ചരിത്രത്തിലെ നാഴികക്കല്ലുകൾ പരിശോധിച്ചാൽ, 1932-ൽ ലോർഡ്സിൽ നടന്ന അരങ്ങേറ്റ മത്സരത്തിൽ സി.കെ. നായിഡുവായിരുന്നു നായകൻ. മഹാരാജ ഓഫ് പോർബന്ദറെ ക്യാപ്റ്റനായി നിശ്ചയിച്ചിരുന്നെങ്കിലും അന്തിമമായി ടീമിനെ നയിച്ചത് നായിഡുവായിരുന്നു. മൻസൂർ അലി ഖാൻ പട്ടൗഡിയുടെ നേതൃത്വത്തിൽ നടന്ന ഇന്ത്യയുടെ 100-ാം ടെസ്റ്റിൽ ഇംഗ്ലണ്ടിനോട് പരാജയപ്പെട്ടെങ്കിലും, ശ്രീനിവാസൻ വെങ്കട്ടരാഘവൻ, ബി. ചന്ദ്രശേഖർ, ബിഷൻ സിങ് ബേദി, ഏറാപ്പള്ളി പ്രസന്ന എന്നിവർ ചേർന്ന് ഇംഗ്ലണ്ടിന്റെ 10 വിക്കറ്റുകളും വീഴ്ത്തിയത് ശ്രദ്ധേയമായി.
ലാഹോറിലെ ഗദ്ദാഫി സ്റ്റേഡിയത്തിൽ സുനിൽ ഗാവസ്കറിന്റെ നേതൃത്വത്തിൽ നടന്ന 300-ാം ടെസ്റ്റിൽ, മത്സരത്തിനിടെ 7,000 ടെസ്റ്റ് റൺസ് പിന്നിട്ട ഗാവസ്കർ ചരിത്രം കുറിച്ചു. സച്ചിൻ ടെണ്ടുൽക്കർ നയിച്ച 400-ാം ടെസ്റ്റിൽ വിവിഎസ് ലക്ഷ്മൺ അരങ്ങേറ്റം കുറിക്കുകയും, ജവഗൽ ശ്രീനാഥിന്റെ ആറ് വിക്കറ്റ് പ്രകടനത്തിന്റെ ബലത്തിൽ ഇന്ത്യ വിജയിക്കുകയും ചെയ്തു. വിരാട് കോഹ്ലിയുടെ നേതൃത്വത്തിൽ നടന്ന 500-ാം ടെസ്റ്റിൽ ആർ. അശ്വിന്റെയും രവീന്ദ്ര ജഡേജയുടെയും സ്പിൻ കരുത്തിൽ ഇന്ത്യ 197 റൺസിന്റെ തകർപ്പൻ വിജയം സ്വന്തമാക്കിയിരുന്നു.
ഇപ്പോൾ 600-ാം ടെസ്റ്റിന്റെ പടിവാതിൽക്കൽ നിൽക്കുന്ന ടീം ഇന്ത്യ, ശ്രീലങ്കയ്ക്കെതിരായ പരമ്പരയിലൂടെ ലോക ടെസ്റ്റ് ചാമ്പ്യൻഷിപ്പ് ഫൈനൽ ലക്ഷ്യമിട്ടുള്ള നിർണായക ചുവടുവെപ്പാണ് നടത്തുന്നത്. തലമുറമാറ്റത്തിന് ശേഷമുള്ള പുതിയ ടെസ്റ്റ് ടീമിന്റെ യാത്ര കൂടിയാണ് ഈ പരമ്പരയിലൂടെ ആരംഭിക്കുന്നത്.
