തിരുവനന്തപുരം: കേരളത്തിന്റെ കാർഷിക, അനുബന്ധ മേഖലകൾക്ക് കരുത്തേകാൻ 1,534.98 കോടി രൂപയുടെ ബജറ്റ് പ്രഖ്യാപനവുമായി സർക്കാർ. ഫ്രൂട്ട് ഫാമുകൾ, നാളികേര സംഭരണ കേന്ദ്രങ്ങൾ, നെല്ല് സംഭരണം എന്നിവ കാര്യക്ഷമമാക്കുന്നതിലൂടെ കർഷകർക്ക് മികച്ച വരുമാനം ഉറപ്പാക്കാനാണ് സർക്കാർ ലക്ഷ്യമിടുന്നത്. ഇതിനായി കൃഷിയിൽ കൃത്രിമ ബുദ്ധി (AI), ഡ്രോണുകൾ തുടങ്ങിയ ആധുനിക സാങ്കേതികവിദ്യകൾ വ്യാപകമാക്കും. കാർഷിക കടാശ്വാസ കമ്മീഷന്റെ പ്രവർത്തനം കൂടുതൽ ശക്തിപ്പെടുത്തുന്നതിനൊപ്പം, കൃഷിയോടൊപ്പം ഫാം ടൂറിസത്തെയും പ്രോത്സാഹിപ്പിച്ച് കർഷകർക്ക് അധിക വരുമാനം കണ്ടെത്താനുള്ള പ്രത്യേക പദ്ധതികളും ബജറ്റിൽ ഉൾപ്പെടുത്തിയിട്ടുണ്ട്.
സ്ത്രീശാക്തീകരണത്തിനും സാമൂഹിക സുരക്ഷയ്ക്കും ബജറ്റിൽ വലിയ മുൻഗണനയാണ് നൽകിയിരിക്കുന്നത്. കാർഷിക മേഖലയിൽ വനിതാ കൂട്ടായ്മകളെയും സംരംഭങ്ങളെയും പ്രോത്സാഹിപ്പിക്കുന്നതിനൊപ്പം, ദാരിദ്ര്യ നിർമ്മാർജ്ജനം ലക്ഷ്യമിട്ടും വിധവകളുടെയും അശരണരുടെയും സാമ്പത്തിക സുരക്ഷ ഉറപ്പാക്കുന്നതിനും ‘കെപ്കോ ആശ്രയ’ എന്ന പേരിൽ പുതിയ പദ്ധതി നടപ്പിലാക്കും. സമൂഹത്തിലെ പാർശ്വവൽക്കരിക്കപ്പെട്ട വിഭാഗങ്ങൾക്ക് വലിയ കൈത്താങ്ങായി മാറുന്നതാണ് ഈ പദ്ധതി.
മൃഗസംരക്ഷണ മേഖലയ്ക്ക് 258.88 കോടി രൂപയും ക്ഷീരവികസനത്തിന് 102.88 കോടി രൂപയും ബജറ്റിൽ വകയിരുത്തി. മത്സ്യബന്ധന മേഖലയുടെ പുരോഗതിക്കായി ഫിഷറീസ് വകുപ്പിന് 133.43 കോടിയും, ഹാർബർ എൻജിനീയറിങ് വകുപ്പിന് 34 കോടിയും അനുവദിച്ചിട്ടുണ്ട്. തീരദേശവാസികളുടെ പ്രയാസങ്ങൾ കണക്കിലെടുത്ത് മത്സ്യത്തൊഴിലാളികൾക്കുള്ള മണ്ണെണ്ണ സബ്സിഡി 75 രൂപയാക്കി ഉയർത്തിയത് ഈ മേഖലയ്ക്ക് വലിയ ആശ്വാസമാകും.
