ആലപ്പുഴ: ഓടിക്കൊണ്ടിരുന്ന കെ.എസ്.ആർ.ടി.സി ബസിൽ വെച്ച് സഹയാത്രക്കാരിയെ കടന്നുപിടിക്കാൻ ശ്രമിച്ച ജീവനക്കാരനെ പോലീസ് കസ്റ്റഡിയിലെടുത്തു. ആലപ്പുഴയിൽ നിന്ന് കൊല്ലത്തേക്ക് സർവീസ് നടത്തിയ ബസിലാണ് ഞെട്ടിപ്പിക്കുന്ന സംഭവം നടന്നത്. സംഭവത്തിൽ ഹരിപ്പാട് പോലീസ് കേസെടുത്ത് അന്വേഷണം ആരംഭിച്ചു.
രാവിലെ അമ്പലപ്പുഴയ്ക്ക് സമീപത്തുനിന്നാണ് കെ.എസ്.ആർ.ടി.സിയുടെ യൂണിഫോം ധരിച്ച ജീവനക്കാരൻ ബസിൽ കയറിയത്. രണ്ട് പേർക്ക് ഇരിക്കാവുന്ന സീറ്റിൽ യുവതിയുടെ തൊട്ടടുത്ത് ഇരുന്ന ഇയാൾ, യാത്രയ്ക്കിടെ യുവതി ഉറക്കത്തിലായ സമയം നോക്കി മോശമായി പെരുമാറുകയായിരുന്നു. പെട്ടെന്ന് ഉണർന്ന യുവതി ബഹളം വെച്ചതോടെ ഇയാൾ ബസിൽ നിന്ന് ചാടിയിറങ്ങി ഓടാൻ ശ്രമിച്ചു. എന്നാൽ, ബസ് ഡ്രൈവർ ഇയാളെ പിന്തുടർന്ന് പിടികൂടുകയായിരുന്നു.
യുവതി നൽകിയ പരാതിയുടെ അടിസ്ഥാനത്തിൽ ബസ് നേരിട്ട് ഹരിപ്പാട് പോലീസ് സ്റ്റേഷനിലെത്തിക്കുകയായിരുന്നു. കായംകുളം ഡിപ്പോയിലെ ജീവനക്കാരനാണ് പ്രതിയെന്നും ഡ്യൂട്ടിക്ക് പോകവെയാണ് ഇയാൾ ബസിൽ കയറിയതെന്നുമാണ് പ്രാഥമിക വിവരം. പോലീസ് കസ്റ്റഡിയിലുള്ള പ്രതിയുടെ അറസ്റ്റ് നടപടികൾ ഉടൻ പൂർത്തിയാക്കുമെന്ന് അധികൃതർ അറിയിച്ചു.
