കൊച്ചി: ആഗോള വിപണിയിലെ സമ്മിശ്ര സൂചനകൾക്കിടയിലും ഇന്ത്യൻ ഓഹരി വിപണി ചൊവ്വാഴ്ച നേട്ടത്തോടെ വ്യാപാരം ആരംഭിക്കുമെന്ന പ്രതീക്ഷയിലാണ് നിക്ഷേപകർ. ഗിഫ്റ്റ് നിഫ്റ്റി സൂചിപ്പിക്കുന്ന അനുകൂലമായ ട്രെൻഡും യുഎസ് വിപണികളിലെ മികച്ച പ്രകടനവും വിപണിക്ക് കരുത്താകുന്നു. തിങ്കളാഴ്ച തുടർച്ചയായ നാലാം സെഷനിലും നേട്ടം നിലനിർത്തിയ ഇന്ത്യൻ വിപണിയിൽ, സെൻസെക്സ് 521.16 പോയിന്റ് ഉയർന്ന് 78,285.07 ലും നിഫ്റ്റി 159.50 പോയിന്റ് ഉയർന്ന് 24,430.35 ലുമാണ് വ്യാപാരം അവസാനിപ്പിച്ചത്.
ഏഷ്യൻ വിപണികൾ ഇന്ന് സമ്മിശ്രമായാണ് പ്രതികരിക്കുന്നത്. ജപ്പാനിലെ നിക്കി ഉൾപ്പെടെയുള്ള സൂചികകളിൽ നേരിയ ഇടിവ് കാണുമ്പോൾ, ഗിഫ്റ്റ് നിഫ്റ്റി 24,578 ലെവലിൽ വ്യാപാരം തുടരുന്നത് ഇന്ത്യൻ സൂചികകൾക്ക് പോസിറ്റീവ് തുടക്കം ലഭിക്കുമെന്ന സൂചന നൽകുന്നു. അതേസമയം, യുഎസ് വിപണിയിൽ സാങ്കേതിക ഓഹരികളുടെ നേതൃത്വത്തിൽ മികച്ച മുന്നേറ്റമുണ്ടായി. നാസ്ഡാക്ക് 1.12 ശതമാനം ഉയർന്നപ്പോൾ ഡൗ ജോൺസും എസ് ആൻഡ് പി സൂചികകളും നേട്ടത്തിൽ വ്യാപാരം അവസാനിപ്പിച്ചു. എൻവിഡിയ, ടെസ്ല, മെറ്റാ, ആൽഫബെറ്റ് തുടങ്ങിയ മുൻനിര ഓഹരികൾ മികച്ച പ്രകടനം കാഴ്ചവെച്ചു. ചരക്ക് വിപണിയിൽ അസംസ്കൃത എണ്ണ വിലയിൽ നേരിയ വർധനവുണ്ടായപ്പോൾ സ്വർണ്ണ വിലയിൽ ഇടിവ് രേഖപ്പെടുത്തി.
ഇന്ന് ശ്രദ്ധിക്കേണ്ട പ്രധാന ഓഹരികളിൽ റിലയൻസ് ഇൻഡസ്ട്രീസ്, ട്രെന്റ്, ടൈറ്റൻ, കൊച്ചിൻ ഷിപ്പ്യാർഡ്, ഇന്ത്യൻ ഓയിൽ കോർപ്പറേഷൻ, നെസ്ലെ എന്നിവ ഉൾപ്പെടുന്നു. റിലയൻസ് ഇൻഡസ്ട്രീസിന് സെബിയിൽ നിന്ന് അഡ്മിനിസ്ട്രേറ്റീവ് മുന്നറിയിപ്പ് ലഭിച്ചത് വിപണിയിൽ ചർച്ചയായിട്ടുണ്ട്. ട്രെന്റ് കമ്പനിയുടെ വരുമാനത്തിൽ 19 ശതമാനവും, ടൈറ്റന്റെ ഉപഭോക്തൃ ബിസിനസിൽ 41 ശതമാനവും വളർച്ച രേഖപ്പെടുത്തി. കൊച്ചിൻ ഷിപ്പ്യാർഡിലെ 5.04 ശതമാനം ഓഹരികൾ ഓഫർ ഫോർ സെയിൽ വഴി സർക്കാർ വിൽക്കുന്നതും, നെസ്ലെ ഹൈദരാബാദിൽ പുതിയ ഗ്ലോബൽ കപ്പാസിറ്റി സെന്റർ സ്ഥാപിക്കുന്നതും നിക്ഷേപകർ ഗൗരവത്തോടെ കാണുന്നു. വിപണികളിലെ അസ്ഥിരത അളക്കുന്ന ഇന്ത്യ വിക്സ് 0.17 ശതമാനം ഉയർന്ന് 11.82 നിലവാരത്തിലാണ് നിലനിൽക്കുന്നത്.
