ഗാള്: രാജ്യം 80-ാം സ്വാതന്ത്ര്യദിനം ആഘോഷിക്കുന്ന വേളയില് ചരിത്രനേട്ടവുമായി ഇന്ത്യന് ക്രിക്കറ്റ് ടീം. ശ്രീലങ്കയ്ക്കെതിരായ ഒന്നാം ടെസ്റ്റില് കളത്തിലിറങ്ങിയതോടെ ടെസ്റ്റ് ക്രിക്കറ്റില് 600 മത്സരങ്ങള് പൂര്ത്തിയാക്കുന്ന മൂന്നാമത്തെ ടീമായി ഇന്ത്യ മാറി. ഗാളില് നടന്ന മത്സരത്തിന് മുന്നോടിയായി ഇന്ത്യന് ടീം ദേശീയപതാക ഉയര്ത്തി സ്വാതന്ത്ര്യദിനം ആഘോഷിച്ചു. തുടര്ന്ന് നടന്ന മത്സരത്തില് ടോസ് നേടിയ ക്യാപ്റ്റന് ശുഭ്മന് ഗില് ബാറ്റിങ് തിരഞ്ഞെടുക്കുകയായിരുന്നു.
ടെസ്റ്റ് ക്രിക്കറ്റ് ചരിത്രത്തില് 1097 മത്സരങ്ങള് കളിച്ച ഇംഗ്ലണ്ടും 883 മത്സരങ്ങള് പൂര്ത്തിയാക്കിയ ഓസ്ട്രേലിയയുമാണ് ഇന്ത്യയ്ക്ക് മുന്നിലുള്ളത്. 596 ടെസ്റ്റുകളുമായി വെസ്റ്റ് ഇന്ഡീസാണ് ഈ നാഴികക്കല്ലിന് തൊട്ടടുത്ത് നില്ക്കുന്ന മറ്റൊരു രാജ്യം. തലമുറമാറ്റത്തിന്റെ ഘട്ടത്തിലൂടെ കടന്നുപോകുന്ന ഇന്ത്യന് ടീമിന് ഈ ശ്രീലങ്കന് പരമ്പര അതീവ നിര്ണായകമാണ്. വിരാട് കോഹ്ലി, രോഹിത് ശര്മ, രവിചന്ദ്രന് അശ്വിന് തുടങ്ങിയ സീനിയര് താരങ്ങളുടെ അഭാവത്തില് പുതിയൊരു ടീമിനെ വാർത്തെടുക്കാനുള്ള ശ്രമത്തിലാണ് ഇന്ത്യ.
ലോക ടെസ്റ്റ് ചാംപ്യന്ഷിപ്പ് ഫൈനല് സാധ്യതകള് നിലനിർത്തുന്നതിനൊപ്പം പരിശീലകന് ഗൗതം ഗംഭീറിന്റെ കീഴിലുള്ള ടീമിന്റെ ഭാവി സംബന്ധിച്ചും ഈ പരമ്പര വഴിത്തിരിവാകും. പുതിയ നായകന് ശുഭ്മന് ഗില്ലിന്റെ നേതൃത്വത്തില് സ്ഥിരതയാര്ന്ന പ്രകടനം പുറത്തെടുക്കുകയാണ് ഇന്ത്യയുടെ ലക്ഷ്യം. രണ്ട് മത്സരങ്ങളടങ്ങിയ പരമ്പരയില് സമ്പൂര്ണ വിജയം സ്വന്തമാക്കുക എന്ന ലക്ഷ്യത്തോടെയാണ് ഇരു ടീമുകളും കളത്തിലിറങ്ങുന്നത്. ചരിത്രനേട്ടത്തിന്റെ ആവേശത്തിനൊപ്പം പരമ്പര വിജയത്തിന്റെ സമ്മര്ദവും ഗില്ലിനും സംഘത്തിനുമുണ്ട്.
