ഇന്ത്യ: റോഡുകളിലെ അപകടങ്ങൾ കുറയ്ക്കുന്നതിനും സുരക്ഷിതമായ യാത്രാസംസ്കാരം ഉറപ്പാക്കുന്നതിനുമായി കേന്ദ്ര സർക്കാർ വിപ്ലവകരമായ മാറ്റത്തിനൊരുങ്ങുന്നു. വാഹനങ്ങൾ തമ്മിൽ പരസ്പരം ആശയവിനിമയം നടത്തുന്ന അത്യാധുനിക ‘വെഹിക്കിൾ-ടു-വെഹിക്കിൾ’ (V2V) സാങ്കേതികവിദ്യ രാജ്യത്ത് നടപ്പിലാക്കാൻ സർക്കാർ തീരുമാനിച്ചു. ഈ സംവിധാനം വഴി വാഹനങ്ങൾക്ക് തത്സമയം സുരക്ഷാ വിവരങ്ങൾ കൈമാറാൻ സാധിക്കുമെന്നത് ഗതാഗത മേഖലയിൽ വലിയ മാറ്റങ്ങൾ സൃഷ്ടിക്കുമെന്നാണ് വിലയിരുത്തപ്പെടുന്നത്.
V2V ആശയവിനിമയം എന്നത് വയർലെസ് സിഗ്നലുകൾ വഴി വാഹനങ്ങൾ തമ്മിൽ ഡാറ്റ കൈമാറുന്ന സാങ്കേതികവിദ്യയാണ്. കാറുകൾ, ട്രക്കുകൾ, ഇരുചക്ര വാഹനങ്ങൾ എന്നിവയ്ക്ക് തങ്ങളുടെ വേഗത, ദിശ, സ്ഥാനം, ബ്രേക്കിംഗ് വിവരം തുടങ്ങിയവ തൊട്ടടുത്തുള്ള വാഹനങ്ങളിലേക്ക് കൈമാറാൻ ഇതിലൂടെ സാധിക്കും. 5.875 GHz മുതൽ 5.925 GHz വരെയുള്ള പ്രത്യേക റേഡിയോ ഫ്രീക്വൻസി സ്പെക്ട്രം ഉപയോഗിച്ചാണ് ഇതിന്റെ പ്രവർത്തനം. വാഹനങ്ങളിൽ ഘടിപ്പിക്കുന്ന ‘ഓൺ-ബോർഡ് യൂണിറ്റുകൾ’ വഴി ലഭിക്കുന്ന ഈ വിവരങ്ങൾ ഡ്രൈവർമാർക്ക് മുന്നറിയിപ്പ് നൽകുകയോ, ആവശ്യമെങ്കിൽ വാഹനം സ്വയം വേഗത കുറയ്ക്കുകയോ ചെയ്യും. ഇതിലൂടെ ഡ്രൈവർമാരുടെ കാഴ്ച പരിധിയിൽപ്പെടാത്ത വളവുകളിലെ അപകടങ്ങളും മൂടൽമഞ്ഞ് പോലുള്ള പ്രതികൂല സാഹചര്യങ്ങളിലെ കൂട്ടിയിടികളും ഒഴിവാക്കാനാകും.
രാജ്യത്തെ റോഡപകടങ്ങളും അതുമൂലമുണ്ടാകുന്ന ജീവനഷ്ടങ്ങളും കുറയ്ക്കുക എന്ന ലക്ഷ്യത്തോടെയാണ് സർക്കാർ ഈ പദ്ധതിക്ക് രൂപം നൽകിയിരിക്കുന്നത്. ആംബുലൻസുകൾ എത്തുമ്പോൾ മറ്റ് വാഹനങ്ങൾക്ക് വഴിമാറിക്കൊടുക്കാൻ ഈ സംവിധാനം കൂടുതൽ കാര്യക്ഷമമാകും. പദ്ധതിയുടെ ഭാഗമായി റോഡ് ഗതാഗത മന്ത്രാലയം ഇതിനകം കരട് വിജ്ഞാപനം പുറത്തിറക്കിക്കഴിഞ്ഞു. പുതിയ മാനദണ്ഡങ്ങൾ പ്രകാരം, 2027 ഒക്ടോബർ 1 മുതൽ വിപണിയിലെത്തുന്ന വാഹനങ്ങൾ സുരക്ഷാ ക്രമീകരണങ്ങൾ പാലിക്കണം. തുടർന്ന്, 2028 ഒക്ടോബർ 1 മുതൽ ഇന്ത്യയിൽ നിർമ്മിക്കുന്ന എല്ലാ പുതിയ ഇരുചക്ര, യാത്രാ, വാണിജ്യ വാഹനങ്ങളിലും V2V ആശയവിനിമയ സംവിധാനം നിർബന്ധമാക്കാനാണ് സർക്കാർ തീരുമാനം.
