മെക്സിക്കോ സിറ്റി: ഫുട്ബോള് ലോകകപ്പുകളിലെ അവിസ്മരണീയ പ്രകടനങ്ങളിലൂടെ ആരാധകരുടെ മനംകവർന്ന മെക്സിക്കന് ഇതിഹാസ ഗോള്കീപ്പര് ഗില്ലെര്മോ ഓച്ചോവ പ്രൊഫഷണല് ഫുട്ബോളില് നിന്ന് വിരമിച്ചു. 41-ാം വയസ്സിലാണ് താരം തന്റെ കായിക ജീവിതത്തിന് വിരാമമിടുന്നത്. ലയണല് മെസ്സി, ക്രിസ്റ്റ്യാനോ റൊണാള്ഡോ എന്നിവര്ക്കൊപ്പം ആറ് ഫിഫ ലോകകപ്പുകളില് ദേശീയ ടീമിനെ പ്രതിനിധീകരിച്ച അപൂര്വ താരങ്ങളുടെ പട്ടികയിലാണ് ഓച്ചോവയും ഇടംപിടിച്ചത്.
2006 മുതല് 2026 വരെ തുടര്ച്ചയായി ലോകകപ്പ് വേദിയിലെത്തിയ ഓച്ചോവ, മെക്സിക്കോയുടെ എക്കാലത്തെയും മികച്ച ഗോള്കീപ്പര്മാരില് ഒരാളായാണ് വിലയിരുത്തപ്പെടുന്നത്. മെക്സിക്കോയ്ക്കായി 150-ലധികം രാജ്യാന്തര മത്സരങ്ങളില് വല കാത്ത അദ്ദേഹം, ലോകകപ്പ് വേദിയിലെ അസാധാരണ പ്രകടനങ്ങളിലൂടെ ‘ലോകകപ്പ് സ്പെഷ്യലിസ്റ്റ്’ എന്ന വിശേഷണം സ്വന്തമാക്കി. 2014 ബ്രസീല് ലോകകപ്പില് ആതിഥേയരായ ബ്രസീലിനെതിരെ നടത്തിയ ആറ് നിര്ണായക സേവുകളും, 2018 റഷ്യ ലോകകപ്പില് നിലവിലെ ചാമ്പ്യന്മാരായ ജര്മനിയെ അട്ടിമറിച്ച മത്സരത്തിലെ പ്രകടനവും അദ്ദേഹത്തിന്റെ കരിയറിലെ പൊന്തൂവലുകളാണ്. 2022 ഖത്തര് ലോകകപ്പില് പോളണ്ടിനെതിരെ റോബര്ട്ട് ലെവന്ഡോവ്സ്കിയുടെ പെനാല്റ്റി തടഞ്ഞുനിര്ത്തിയതും ആരാധകര്ക്ക് മറക്കാനാകാത്ത നിമിഷമായി മാറിയിരുന്നു.
ദേശീയ ടീമിനൊപ്പം അഞ്ച് തവണ കോണ്കകാഫ് ഗോള്ഡ് കപ്പ് കിരീടം ഉയര്ത്താന് സാധിച്ചത് ഓച്ചോവയുടെ കരിയറിലെ വലിയ നേട്ടമാണ്. ക്ലബ് തലത്തിലും മികച്ച പ്രകടനം പുറത്തെടുക്കാന് അദ്ദേഹത്തിന് കഴിഞ്ഞു. മെക്സിക്കന് ക്ലബ്ബുകള്ക്ക് പുറമെ ഫ്രാന്സിലെ അജാക്സിയോ, സ്പെയിനിലെ മലാഗ, ബെല്ജിയത്തിലെ സ്റ്റാന്ഡേര്ഡ് ലിയേജ്, ഇറ്റലിയിലെ സലെര്നിറ്റാന എന്നീ ക്ലബ്ബുകളുടെ ജഴ്സിയിലും അദ്ദേഹം തിളങ്ങി. രണ്ട് പതിറ്റാണ്ടിലേറെ നീണ്ട സേവനത്തിന് ശേഷം ലോക ഫുട്ബോളിലെ എക്കാലത്തെയും മികച്ച ഗോള്കീപ്പര്മാരില് ഒരാളെന്ന പദവിയോടെയാണ് ഓച്ചോവ കളമൊഴിയുന്നത്.
