ഗുരുവായൂർ: സംസ്ഥാനത്ത് സ്വർണവിലയിൽ കുത്തനെ ഇടിവ്. ഇന്ന് ഒറ്റയടിക്ക് ഗ്രാമിന് 130 രൂപയും പവന് 1,040 രൂപയുമാണ് കുറഞ്ഞത്. ഈ വിലക്കുറവോടെ ഒരു ഗ്രാം സ്വർണത്തിന്റെ വില 13,100 രൂപയായും, പവൻ വില 1,04,800 രൂപയായും താഴ്ന്നു. സ്വർണാഭരണങ്ങൾ സ്വന്തമാക്കാൻ കാത്തിരുന്നവർക്ക് വലിയ ആശ്വാസമാണ് ഈ വിപണി മാറ്റം നൽകുന്നത്.
സാധാരണക്കാർ ഏറെ ആശ്രയിക്കുന്ന ലൈറ്റ് വെയ്റ്റ് ആഭരണങ്ങൾ നിർമ്മിക്കാൻ ഉപയോഗിക്കുന്ന 18 കാരറ്റ് സ്വർണത്തിന്റെ വിലയിലും ഇടിവുണ്ടായിട്ടുണ്ട്. ഗ്രാമിന് 105 രൂപ കുറഞ്ഞ് 10,770 രൂപയിലാണ് ഇന്നത്തെ വ്യാപാരം പുരോഗമിക്കുന്നത്. അതേസമയം, വെള്ളിവിലയിൽ മാറ്റമില്ലാതെ ഗ്രാമിന് 240 രൂപ എന്ന നിരക്കിൽ തന്നെ തുടരുന്നു.
അന്താരാഷ്ട്ര വിപണിയിലുണ്ടായ വിലയിടിവാണ് സംസ്ഥാനത്തെ സ്വർണവിലയിലും പ്രതിഫലിച്ചത്. ആഗോള വിപണിയിൽ സ്വർണത്തിന്റെ വിലയിൽ ഒരു ശതമാനത്തിലധികം ഇടിവ് രേഖപ്പെടുത്തിയതോടെ വില ഔൺസിന് 4,060 ഡോളറിലെത്തി. പശ്ചിമേഷ്യയിലെ സംഘർഷങ്ങൾ അന്താരാഷ്ട്ര വിപണിയിലെ നിക്ഷേപകരെയും വ്യാപാരത്തെയും കാര്യമായി സ്വാധീനിക്കുന്നുണ്ട്. ക്രൂഡ് ഓയിൽ വില 80 ഡോളറിലേക്ക് ഉയർന്നതും, അമേരിക്ക പലിശ നിരക്ക് വർദ്ധിപ്പിച്ചേക്കുമെന്ന സൂചനകളുമാണ് സ്വർണവിപണിക്ക് തിരിച്ചടിയായത്. ആഗോളതലത്തിലെ ഈ സാമ്പത്തിക സാഹചര്യങ്ങൾ വരും ദിവസങ്ങളിലും സ്വർണവിലയിൽ സമ്മിശ്ര പ്രതികരണങ്ങൾ ഉണ്ടാക്കുമെന്നാണ് വിപണി വിദഗ്ധരുടെ വിലയിരുത്തൽ.
