കൊച്ചി: താരസംഘടനയായ ‘അമ്മ’യുടെ ഭരണച്ചുമതല ഇനി അഡ്ഹോക് കമ്മിറ്റിക്ക്. നടനും എംഎൽഎയുമായ രമേശ് പിഷാരടിയുടെ നേതൃത്വത്തിലുള്ള സമിതിക്കാണ് സംഘടനയുടെ താത്കാലിക ചുമതല കൈമാറിയത്. മുൻ എംഎൽഎയും നടനുമായ കെ ബി ഗണേഷ് കുമാറും അഡ്ഹോക് കമ്മിറ്റിയിൽ അംഗമാണ്. ശ്വേത മേനോന്റെ നേതൃത്വത്തിലുള്ള ഭരണസമിതി ഒന്നടങ്കം രാജിവെച്ച സാഹചര്യത്തിലാണ് പുതിയ ക്രമീകരണം നിലവിൽ വന്നത്.
അഡ്ഹോക് കമ്മിറ്റിയുടെ കാലാവധി നാല് മാസമായി നിശ്ചയിച്ചിട്ടുണ്ട്. ഈ കാലയളവിനുള്ളിൽ തിരഞ്ഞെടുപ്പ് നടത്തി പുതിയ ഭരണസമിതിയെ കണ്ടെത്തും. സംഘടനയുടെ പ്രതിച്ഛായ പുനഃസ്ഥാപിക്കുമെന്ന പ്രതീക്ഷയിലാണ് വനിതാ നേതൃത്വത്തിലുള്ള ഭരണസമിതി അധികാരമേറ്റതെങ്കിലും, ആഭ്യന്തര ഭിന്നതകളും ആരോപണങ്ങളും പ്രതിസന്ധി സൃഷ്ടിക്കുകയായിരുന്നു. സംഘടനയിൽ ചില കുറ്റാരോപിതർ വീണ്ടും സ്വാധീനം ചെലുത്താൻ ശ്രമിക്കുന്നതായി ശ്വേത മേനോൻ ആരോപിച്ചിരുന്നു. അംഗങ്ങളെ സമ്മർദത്തിലാക്കി അവിശ്വാസ പ്രമേയത്തിൽ ഒപ്പിടുവിച്ചതായും, മുൻകൂട്ടി തയ്യാറാക്കിയ അജണ്ടയാണ് ഭരണസമിതിയുടെ രാജിയിലേക്ക് നയിച്ചതെന്നും അവർ വ്യക്തമാക്കി.
വാർഷിക ജനറൽ ബോഡി യോഗത്തിൽ വാർഷിക റിപ്പോർട്ടും കണക്കുകളും അംഗീകരിക്കപ്പെടാതിരുന്നതോടെയാണ് സംഘടനയിലെ പ്രതിസന്ധി രൂക്ഷമായത്. യോഗത്തിൽ ഉയർന്നുവന്ന വിമർശനങ്ങളും വീഴ്ചകളും വലിയ ചർച്ചകൾക്ക് വഴിവെച്ചു. ആദ്യം ശ്വേത മേനോൻ രാജിവെച്ചെങ്കിലും സഹപ്രവർത്തകർ അനുനയിപ്പിക്കാൻ ശ്രമിച്ചിരുന്നു. എന്നാൽ പിന്നീട് 17 അംഗ എക്സിക്യൂട്ടീവ് കമ്മിറ്റിയും ഒരുമിച്ച് രാജിവെക്കുകയായിരുന്നു. സംഘടനയുടെ നിലനിൽപ്പിന് വരും മാസങ്ങൾ നിർണായകമാണ്. പുതിയ നേതൃത്വത്തിന് ‘അമ്മ’യിലെ വിശ്വാസ പ്രതിസന്ധി പരിഹരിക്കാൻ കഴിയുമോ എന്നതാണ് സിനിമാ മേഖലയിലെ പ്രധാന ചർച്ചാവിഷയം.
