ന്യൂയോർക്ക്: ഇറാനുമായുള്ള സംഘർഷം രൂക്ഷമായി തുടരുന്നതിനിടെ, നിർണായകമായ ഹോർമുസ് കടലിടുക്ക് അമേരിക്കയുടെ പ്രദേശമായി പ്രഖ്യാപിക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ്. ആഗോള എണ്ണ, പ്രകൃതിവാതകം, വളം വിതരണത്തിന്റെ പ്രധാന പാതയായ ഹോർമുസ് കടലിടുക്കിലൂടെയുള്ള ഗതാഗതം ഇറാൻ തടഞ്ഞ സാഹചര്യത്തിലാണ് ട്രംപിന്റെ പ്രഖ്യാപനം. ന്യൂയോർക്കിൽ നടന്ന പരിപാടിയിൽ സംസാരിക്കവേ, ഇറാനെ പൂർണമായും പരാജയപ്പെടുത്തിയ ശേഷം ഹോർമുസ് കടലിടുക്കിനെ അമേരിക്കയുടെ ഭാഗമായി പ്രഖ്യാപിക്കുമെന്നും ഇത് ലോക രാജ്യങ്ങൾക്ക് നൽകുന്ന വലിയൊരു സേവനമായിരിക്കുമെന്നും ട്രംപ് അവകാശപ്പെട്ടു. ഇറാൻ ഏർപ്പെടുത്തിയിരിക്കുന്ന ഉപരോധത്തെ അദ്ദേഹം രൂക്ഷമായി വിമർശിക്കുകയും ചെയ്തു.
ട്രംപിന്റെ പ്രഖ്യാപനത്തിനെതിരെ ഇറാൻ ശക്തമായ മറുപടിയുമായി രംഗത്തെത്തി. അമേരിക്കയുടെ അവകാശവാദം തള്ളിയ ഇറാൻ ഡെപ്യൂട്ടി വിദേശകാര്യ മന്ത്രി ഖാസിം ഗരിബാൾഡി, ട്വീറ്റുകൊണ്ടോ വിമാനവാഹിനിക്കപ്പലുകൊണ്ടോ തിരഞ്ഞെടുപ്പ് പ്രസംഗം കൊണ്ടോ ഹോർമുസ് കടലിടുക്ക് പിടിച്ചെടുക്കാൻ കഴിയില്ലെന്ന് സോഷ്യൽ മീഡിയയിലൂടെ വ്യക്തമാക്കി. ഭീഷണികളെയോ സൈനിക ശക്തി പ്രകടനത്തെയോ ഇറാൻ ഭയപ്പെടുന്നില്ലെന്നും അദ്ദേഹം കൂട്ടിച്ചേർത്തു. ഇതോടെ, ഹോർമുസ് കടലിടുക്കിന്റെ നിയന്ത്രണം സംബന്ധിച്ച തർക്കം അമേരിക്കയും ഇറാനും തമ്മിലുള്ള സംഘർഷത്തെ പുതിയ തലത്തിലേക്ക് എത്തിച്ചിരിക്കുകയാണ്.
ആഗോള ഊർജ വിപണിയിൽ നിർണായക സ്വാധീനമുള്ള ഹോർമുസ് കടലിടുക്കിലെ ഗതാഗത തടസ്സം വലിയ ആശങ്കകളാണ് സൃഷ്ടിച്ചിരിക്കുന്നത്. ഭൂപ്രദേശികവും തന്ത്രപരവുമായ വിപുലീകരണവുമായി ബന്ധപ്പെട്ട ട്രംപിന്റെ മുൻ നിലപാടുകളും ഇപ്പോൾ ചർച്ചയാകുന്നുണ്ട്. 2025ലെ തന്റെ രണ്ടാം ഉദ്ഘാടന പ്രസംഗത്തിൽ കാനഡ, ഗ്രീൻലാൻഡ് തുടങ്ങിയ പ്രദേശങ്ങൾ അമേരിക്കയോട് കൂട്ടിച്ചേർക്കാനുള്ള പദ്ധതി ട്രംപ് സൂചിപ്പിച്ചിരുന്നു. ഈ വിദേശനയ സമീപനത്തിന്റെ തുടർച്ചയായാണ് ഹോർമുസ് കടലിടുക്കിനെക്കുറിച്ചുള്ള പുതിയ പ്രഖ്യാപനത്തെയും അന്താരാഷ്ട്ര സമൂഹം നോക്കിക്കാണുന്നത്. വരും ദിവസങ്ങളിൽ ഹോർമുസ് കടലിടുക്കിന്റെ നിയന്ത്രണവും ആഗോള ഊർജ വിതരണവും കൂടുതൽ നിർണായക വിഷയങ്ങളായി മാറുമെന്നാണ് വിലയിരുത്തൽ.
