സംസ്ഥാനത്ത്: സംസ്ഥാനത്ത് സ്വർണവിലയിൽ ഇടിവ് തുടരുന്നു. ഗ്രാമിന് 60 രൂപയും പവന് 480 രൂപയുമാണ് ഇന്ന് കുറഞ്ഞത്. ഈ വിലക്കുറവോടെ ഗ്രാമിന് 13,155 രൂപയായും പവന് 1,05,240 രൂപയായും വിപണി നിരക്ക് താഴ്ന്നു. ലൈറ്റ് വെയിറ്റ് ആഭരണങ്ങൾക്കായി ഉപയോഗിക്കുന്ന 18 കാരറ്റ് സ്വർണവില ഗ്രാമിന് 10,805 രൂപയായും കുറഞ്ഞു. അതേസമയം, വെള്ളിവിലയിൽ മാറ്റമില്ലാതെ ഗ്രാമിന് 235 രൂപയിൽ തുടരുകയാണ്. ഒരാഴ്ചക്കിടെ മാത്രം സംസ്ഥാനത്ത് പവന് ഏകദേശം 3,000 രൂപയോളമാണ് കുറഞ്ഞത് എന്നത് സ്വർണം വാങ്ങാൻ കാത്തിരിക്കുന്നവർക്ക് വലിയ ആശ്വാസമാണ്.
അന്താരാഷ്ട്ര വിപണിയിലെ മാറ്റങ്ങളാണ് വിലയിടിവിന് പ്രധാന കാരണം. യുഎസ്-ഇറാൻ സംഘർഷങ്ങളിൽ അയവുവന്നത് സ്വർണത്തിന്റെ ഡിമാൻഡിനെ ബാധിച്ചിട്ടുണ്ട്. സുരക്ഷിത നിക്ഷേപം എന്ന നിലയിൽ നിന്ന് സ്വർണം അല്പം പിന്നോട്ടിറങ്ങിയതും, നിക്ഷേപകർ ലാഭമെടുപ്പിനായി സ്വർണം വിറ്റഴിച്ചതും വിലയിൽ പ്രതിഫലിച്ചു. കൂടാതെ, യുഎസ് ഫെഡ് റിസർവ് പലിശ നിരക്ക് സംബന്ധിച്ച പ്രഖ്യാപനം വരാനിരിക്കുന്നത് വിപണിയിൽ ആശങ്ക സൃഷ്ടിക്കുന്നുണ്ട്. പലിശ നിരക്ക് വർധിപ്പിക്കുകയാണെങ്കിൽ നിക്ഷേപകർ കൂടുതൽ ആകർഷകമായ ബോണ്ടുകളിലേക്ക് തിരിയാൻ സാധ്യതയുണ്ട്, ഇത് സ്വർണവില വീണ്ടും ഇടിയാൻ കാരണമായേക്കാം.
വില നിർണ്ണയത്തിൽ നിർണ്ണായകമായ യുഎസ് ഫെഡ് നിരക്ക് പ്രഖ്യാപനത്തിന് ഇനി മണിക്കൂറുകൾ മാത്രമാണ് ബാക്കി. ഫെഡ് നിരക്കിലെ മാറ്റങ്ങൾക്ക് അനുസരിച്ചുള്ള വലിയ ചലനങ്ങൾ നാളത്തെ സ്വർണവിലയിലും പ്രതിഫലിക്കുമെന്നാണ് വിപണി വിദഗ്ധരുടെ വിലയിരുത്തൽ. നിലവിലെ സാഹചര്യത്തിൽ സ്വർണവിപണിയിലെ ഈ ചാഞ്ചാട്ടം നിക്ഷേപകരും ഉപഭോക്താക്കളും ഏറെ ശ്രദ്ധയോടെയാണ് നിരീക്ഷിക്കുന്നത്.
