കേരളം: സംസ്ഥാനത്ത് സ്വർണവിലയിൽ കുതിച്ചുചാട്ടം. വിപണിയിൽ ഇന്ന് രാവിലെ ഒറ്റയടിക്ക് ഗ്രാമിന് 210 രൂപയും പവന് 1680 രൂപയുമാണ് വർധിച്ചത്. ഇതോടെ സംസ്ഥാനത്ത് ഒരു ഗ്രാം സ്വർണത്തിന്റെ വില 13,430 രൂപയായും, ഒരു പവൻ സ്വർണത്തിന്റെ വില 1,07,440 രൂപയായും ഉയർന്നു. ഈ റെക്കോർഡ് വിലക്കയറ്റം ആഭരണ പ്രേമികളെ വലിയ ആശങ്കയിലാക്കിയിരിക്കുകയാണ്.
ആഗോളതലത്തിലുള്ള രാഷ്ട്രീയ അസ്ഥിരതകളാണ് സ്വർണവിലയിലെ ഈ കുതിപ്പിന് പ്രധാന കാരണം. പശ്ചിമേഷ്യയിലെ യുദ്ധ സാഹചര്യങ്ങൾ കൂടുതൽ വഷളായതാണ് സുരക്ഷിത നിക്ഷേപമെന്ന നിലയിൽ സ്വർണത്തിലേക്ക് ആളുകളെ ആകർഷിക്കുന്നത്. എണ്ണവിലയും ഡോളർ സൂചികയും ഉയർന്നു നിൽക്കുമ്പോഴും സ്വർണത്തിന്റെ വിപണി മൂല്യം കുറയാതെ തുടരുകയാണ്. അന്താരാഷ്ട്ര വിപണിയിൽ സ്വർണവില ഔൺസിന് 4,118 ഡോളറിലെത്തി നിൽക്കുന്നത് കേരളത്തിലെ സ്വർണ വിപണിയിലും നേരിട്ട് പ്രതിഫലിക്കുകയാണ്.
22 കാരറ്റ് സ്വർണത്തിന് പുറമെ മറ്റ് ആഭരണ വിഭാഗങ്ങളിലും വലിയ വില വർധന രേഖപ്പെടുത്തിയിട്ടുണ്ട്. ലൈറ്റ് വെയ്റ്റ് ആഭരണങ്ങൾ നിർമ്മിക്കാൻ ഉപയോഗിക്കുന്ന 18 കാരറ്റ് സ്വർണം ഗ്രാമിന് 175 രൂപ വർധിച്ച് 11,035 രൂപയിലാണ് വ്യാപാരം പുരോഗമിക്കുന്നത്. കൂടാതെ, വെള്ളി വിലയിലും സമാനമായ വർദ്ധനവുണ്ടായിട്ടുണ്ട്. ഗ്രാമിന് അഞ്ചു രൂപ വർധിച്ച് 240 രൂപയാണ് ഇന്നത്തെ വിപണിയിലെ വെള്ളിയുടെ നിരക്ക്. പശ്ചിമേഷ്യയിൽ വെടിനിർത്തൽ നടപ്പിലായാൽ അത് എണ്ണവിലയും ഡോളറിന്റെ മൂല്യവും താഴാൻ കാരണമാകുമെന്ന് സാമ്പത്തിക വിദഗ്ധർ വിലയിരുത്തുന്നു. ഈ മാറ്റങ്ങൾ വിപണിയിൽ പുതിയ വഴിതിരിവുകൾ സൃഷ്ടിക്കുമെന്ന പ്രതീക്ഷയിലാണ് നിക്ഷേപകർ.
