തിരുവനന്തപുരം: എൽ.പി. സ്കൂൾ വിദ്യാർഥികൾക്കായി തയ്യാറാക്കിയ ‘ഫ്രീഡം ക്വിസ്’ ചോദ്യാവലിയിൽ വി.ഡി. സവർക്കറെക്കുറിച്ചുള്ള ചോദ്യം ഉൾപ്പെടുത്തിയത് വിവാദമായതിനെത്തുടർന്ന് അധ്യാപകനെ സസ്പെൻഡ് ചെയ്തു. കാസർകോട് പള്ളത്തടുക്ക സ്കൂളിലെ അധ്യാപകൻ ഗുരുപ്രസാദിനെയാണ് വിദ്യാഭ്യാസ മന്ത്രിയുടെ നിർദേശപ്രകാരം സർവീസിൽ നിന്ന് സസ്പെൻഡ് ചെയ്തത്. മഞ്ചേശ്വരം, കുമ്പള, കാസർകോട് ഉപജില്ലകളിലെ സ്കൂളുകളിലെ വിദ്യാർഥികൾക്കായി സംഘടിപ്പിച്ച ക്വിസ് പരിപാടിയിലാണ് വിവാദമായ ചോദ്യം ഉൾപ്പെട്ടത്.
ഗുരുപ്രസാദിന്റെ നേതൃത്വത്തിലാണ് ക്വിസിനായുള്ള ചോദ്യാവലി തയ്യാറാക്കിയത്. ‘ബ്രിട്ടീഷുകാരിൽ നിന്ന് ഏറ്റവും കൂടുതൽ ശിക്ഷ ലഭിച്ച സ്വാതന്ത്ര്യസമര സേനാനി ആരാണ്?’ എന്ന ചോദ്യത്തിന് ഉത്തരസൂചികയിൽ വി.ഡി. സവർക്കറുടെ പേര് നൽകിയതാണ് പ്രതിഷേധത്തിന് ഇടയാക്കിയത്. ചോദ്യാവലി പുറത്തുവന്നതിന് പിന്നാലെ വിവിധ സംഘടനകൾ വിയോജിപ്പുമായി രംഗത്തെത്തുകയും പരാതികൾ ഉയരുകയും ചെയ്തതോടെയാണ് വകുപ്പുതല നടപടി സ്വീകരിച്ചത്.
സ്വാതന്ത്ര്യസമര ചരിത്രത്തെയും സവർക്കറുടെ രാഷ്ട്രീയ ആശയങ്ങളെയും സംബന്ധിച്ച ചർച്ചകൾ നേരത്തെയും പലതവണ രാഷ്ട്രീയ വിവാദങ്ങൾക്ക് വഴിവെച്ചിട്ടുണ്ട്. ഈ സാഹചര്യത്തിൽ, പ്രാഥമിക തലത്തിലുള്ള വിദ്യാർഥികൾക്കായി തയ്യാറാക്കിയ ക്വിസിൽ ഇത്തരമൊരു ചോദ്യം ഉൾപ്പെടുത്തിയത് വലിയ തോതിൽ ചർച്ചയായി. സംഭവത്തിൽ വിദ്യാഭ്യാസ വകുപ്പ് വിശദമായ അന്വേഷണത്തിനും നിർദ്ദേശം നൽകിയിട്ടുണ്ട്.
