ബെംഗളൂരു: നീറ്റ്-യുജി 2026 പുനഃപരീക്ഷയ്ക്കിടെ ബെംഗളൂരുവിൽ വിദ്യാർത്ഥികൾക്ക് നേരിടേണ്ടി വന്നത് ഹൃദയഭേദകമായ സാഹചര്യങ്ങൾ. നഗരത്തിലെ പാലസ് റോഡിലുള്ള ഗവൺമെന്റ് രാമനാരായണ ചെല്ലാരം കോളേജിലെ പരീക്ഷാകേന്ദ്രത്തിൽ റിപ്പോർട്ടിംഗ് സമയം കഴിഞ്ഞെത്തിയ വിദ്യാർത്ഥികൾക്ക് പ്രവേശനം നിഷേധിച്ചു. പരീക്ഷ നഷ്ടപ്പെടുമെന്ന ഭയത്തിൽ ഒരു വിദ്യാർത്ഥിനി പരീക്ഷാകേന്ദ്രത്തിന്റെ അടഞ്ഞ ഗേറ്റ് ചാടിക്കടക്കാൻ ശ്രമിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. വർഷങ്ങളായുള്ള കഠിനാധ്വാനവും സ്വപ്നങ്ങളും നിമിഷങ്ങൾക്കുള്ളിൽ തകർന്നുവീണതിന്റെ വേദനയിലാണ് വിദ്യാർത്ഥികളും രക്ഷിതാക്കളും.
രാജ്യത്തുടനീളം കർശന സുരക്ഷാ ക്രമീകരണങ്ങളോടെ ഉച്ചയ്ക്ക് 2:00 മുതൽ 5:15 വരെയാണ് നീറ്റ്-യുജി പുനഃപരീക്ഷ നടന്നത്. എന്നാൽ, ബെംഗളൂരു പാലസ് ഗ്രൗണ്ടിൽ സംഘടിപ്പിച്ച കർണാടക പ്രദേശ് കോൺഗ്രസ് കമ്മിറ്റി പ്രസിഡന്റിന്റെ ചുമതലയേൽക്കൽ ചടങ്ങിനെ തുടർന്നുണ്ടായ കനത്ത ഗതാഗതക്കുരുക്കാണ് വിദ്യാർത്ഥികൾക്ക് പരീക്ഷാകേന്ദ്രത്തിൽ സമയത്ത് എത്താൻ തടസ്സമായതെന്നാണ് ആരോപണം. പരീക്ഷാദിവസം തന്നെ നഗരമധ്യത്തിൽ ഇത്തരമൊരു വൻ രാഷ്ട്രീയ സമ്മേളനം സംഘടിപ്പിച്ചത് ഭരണകൂടത്തിന്റെ മുൻഗണനകളെ ചോദ്യം ചെയ്യുന്നതായും വിമർശനങ്ങൾ ഉയരുന്നുണ്ട്.
സംഭവത്തിൽ ബിജെപി നേതാവ് ബി വൈ വിജയേന്ദ്ര കോൺഗ്രസ് സർക്കാരിനെ രൂക്ഷമായി വിമർശിച്ചു. നീറ്റ് പരീക്ഷ നടക്കുന്ന കാര്യം അറിഞ്ഞിട്ടും അതേസമയം തന്നെ രാഷ്ട്രീയ ശക്തിപ്രകടനം സംഘടിപ്പിച്ചത് ഭരണകൂടത്തിന്റെ ഉത്തരവാദിത്വമില്ലായ്മയാണെന്ന് അദ്ദേഹം കുറ്റപ്പെടുത്തി. വിദ്യാർത്ഥികളുടെ ഭാവിയെക്കാൾ രാഷ്ട്രീയത്തിന് മുൻഗണന നൽകിയ കോൺഗ്രസ് സർക്കാർ, യഥാർത്ഥത്തിൽ വിദ്യാർത്ഥികൾക്ക് പിന്തുണ ആവശ്യമുള്ള സമയത്ത് അവരെ അവഗണിച്ചതായും വിജയേന്ദ്ര ആരോപിച്ചു. പരീക്ഷാദിനത്തിൽ ഗതാഗത നിയന്ത്രണം പോലും ഉറപ്പാക്കാൻ സാധിക്കാത്തത് സർക്കാരിന്റെ ഗുരുതരമായ വീഴ്ചയാണെന്നാണ് പൊതുസമൂഹത്തിൽ നിന്ന് ഉയരുന്ന പ്രധാന വിമർശനം.
