മുംബൈ: ധുരന്ധർ എന്ന സിനിമയ്ക്കെതിരെ ഉയരുന്ന പ്രൊപ്പഗണ്ട ആരോപണങ്ങളിൽ രൂക്ഷ പ്രതികരണവുമായി നടൻ ആർ. മാധവൻ രംഗത്ത്. സിനിമയിൽ അജിത് ഡോവലിന്റെ കഥാപാത്രത്തെ അവതരിപ്പിക്കുന്ന മാധവൻ, ഇന്ത്യയെക്കുറിച്ച് അഭിമാനത്തോടെ സംസാരിക്കുന്നത് എങ്ങനെയാണ് തെറ്റാകുന്നതെന്ന് ചോദ്യമുന്നയിച്ചു. പാകിസ്ഥാൻ ഭരണാധികാരികളും അധോലോക സംഘങ്ങളും മുൻകാല ഇന്ത്യൻ രാഷ്ട്രീയ നേതാക്കളും തമ്മിലുള്ള അവിശുദ്ധ ബന്ധത്തിന്റെ പശ്ചാത്തലത്തിൽ ഒരുക്കിയ സിനിമയെ പ്രൊപ്പഗണ്ടയെന്ന് വിശേഷിപ്പിക്കുന്നവർക്കുള്ള മറുപടിയിലാണ് അദ്ദേഹം നിലപാട് വ്യക്തമാക്കിയത്.
താൻ അവതരിപ്പിക്കുന്ന കഥാപാത്രത്തെ മുൻനിർത്തി ഉയരുന്ന വിമർശനങ്ങൾക്ക് മറുപടിയായി, താൻ ഇന്ത്യക്കാരനായി അഭിമാനത്തോടെ നിലകൊള്ളുന്നത് തെറ്റാണോ എന്ന് മാധവൻ ചോദിച്ചു. താൻ കണ്ട കാര്യങ്ങൾ അതേ രീതിയിൽ സിനിമയിൽ ആവിഷ്കരിക്കാൻ മാത്രമാണ് ശ്രമിച്ചതെന്നും, ഇതിനെ ഒരു രാഷ്ട്രീയ പ്രസ്താവനയായി കാണേണ്ടതില്ലെന്നും അദ്ദേഹം കൂട്ടിച്ചേർത്തു. നേരത്തെ തന്റെ സംവിധാന സംരംഭമായ റോകട്രി: ദ നമ്പി ഇഫക്റ്റ് എന്ന ചിത്രവും സമാനമായ രീതിയിൽ ഇന്ത്യാഭിമാനത്തിന്റെ പേരിൽ വിമർശനങ്ങൾ നേരിട്ടിരുന്നുവെന്ന് അദ്ദേഹം ഓർമ്മിപ്പിച്ചു.
പാകിസ്ഥാന്റെ പശ്ചാത്തലത്തിൽ കഥ പറയുന്ന ധുരന്ധറിൽ, അവിടെയുള്ള നന്മയും തിന്മയും സ്വാഭാവികമായി അവതരിപ്പിക്കുക മാത്രമാണ് ചെയ്തിട്ടുള്ളതെന്ന് മാധവൻ വിശദീകരിച്ചു. സിനിമയിലെ കഥാപാത്രങ്ങളെയും സംഭവങ്ങളെയും താൻ കണ്ട രീതിയിൽ അവതരിപ്പിക്കുക മാത്രമാണ് ചെയ്തതെന്നും, അതിനെ രാഷ്ട്രീയ നിലപാടായി വ്യാഖ്യാനിക്കേണ്ടതില്ലെന്നും അദ്ദേഹം ആവർത്തിച്ചു വ്യക്തമാക്കി. നിലവിൽ സിനിമാ മേഖലയിലും പൊതുസമൂഹത്തിലും ഈ വിഷയത്തിൽ വലിയ ചർച്ചകളാണ് നടക്കുന്നത്.
