ന്യൂഡൽഹി: മെയ് മാസത്തിൽ ഇന്ത്യയുടെ വ്യാപാര മേഖലയിൽ മികച്ച ഉണർവ് പ്രകടമായി. എഞ്ചിനീയറിംഗ്, പെട്രോളിയം, ഇലക്ട്രോണിക്സ് ഉൽപ്പന്നങ്ങളുടെ കയറ്റുമതിയിലുണ്ടായ കുതിപ്പ് രാജ്യത്തിന്റെ മൊത്തം ചരക്ക് കയറ്റുമതി 18 ശതമാനം വർധിപ്പിച്ച് 45.20 ബില്യൺ ഡോളറിലെത്തിച്ചു. സേവന കയറ്റുമതിയിലും സമാനമായ വളർച്ചാ പ്രവണതയാണ് ദൃശ്യമാകുന്നത്.
അതേസമയം, ഇറക്കുമതി 20.6 ശതമാനം ഉയർന്ന് 73.41 ബില്യൺ ഡോളറിലെത്തിയത് വ്യാപാര കമ്മി 28.21 ബില്യൺ ഡോളറായി വർധിക്കാൻ കാരണമായി. ആഗോളതലത്തിലെ ഡിമാൻഡ് കുറവും ഉയർന്ന ലോജിസ്റ്റിക് ചെലവുകളും നിലവിൽ വെല്ലുവിളിയായി തുടരുന്നുണ്ടെങ്കിലും സേവന മേഖലയിലെ മികച്ച പ്രകടനം വലിയ പ്രതീക്ഷയാണ് നൽകുന്നത്. മെയ് മാസത്തിൽ സേവന കയറ്റുമതി മുൻ വർഷത്തെ 32.46 ബില്യൺ ഡോളറിൽ നിന്ന് 36.76 ബില്യൺ ഡോളറായി ഉയർന്നു. സേവന ഇറക്കുമതി ഇക്കാലയളവിൽ 19.06 ബില്യൺ ഡോളറുമാണ്.
യുഎസ്-ഇറാൻ സമാധാനപരമായ സാഹചര്യങ്ങൾ ഇന്ത്യയുടെ വ്യാപാര മേഖലയ്ക്ക് ആശ്വാസമാകും. ഹോർമുസ് കടലിടുക്കിലെ സംഘർഷങ്ങൾ ലഘൂകരിക്കപ്പെടുന്നത് ചരക്ക് നീക്കത്തിലെ തടസ്സങ്ങൾ നീക്കാനും ഗതാഗത ചെലവ് കുറയ്ക്കാനും സഹായിക്കും. ഇത് ചെറുകിട ബിസിനസ്സുകൾക്കും ഗൾഫ് മേഖലയെ ആശ്രയിക്കുന്ന കയറ്റുമതിക്കാർക്കും വലിയ ഗുണം ചെയ്യും. 2031-ഓടെ മൊത്തം കയറ്റുമതി 2 ട്രില്യൺ ഡോളറിലെത്തിക്കുക എന്ന ലക്ഷ്യത്തോടെ എംഎസ്എംഇ (MSME) മേഖലയ്ക്കും കാർഷിക ഉൽപ്പന്നങ്ങൾക്കും മുൻഗണന നൽകാനും ‘ബ്രാൻഡ് ഇന്ത്യ’ ആഗോളതലത്തിൽ കൂടുതൽ ശക്തമാക്കാനുമാണ് സർക്കാർ തീരുമാനിച്ചിരിക്കുന്നത്.
