ന്യൂഡൽഹി: ഇന്ത്യയുടെ സാങ്കേതിക കുതിപ്പിന് കരുത്തുപകർന്ന് ആമസോണിന്റെ ചരിത്രപരമായ നിക്ഷേപ പ്രഖ്യാപനം. പ്രധാനമന്ത്രി നരേന്ദ്ര മോദിയുമായി ആമസോൺ സിഇഒ ആൻഡി ജാസ്സി ഡൽഹിയിൽ നടത്തിയ കൂടിക്കാഴ്ചയ്ക്ക് പിന്നാലെയാണ്, 2030-ഓടെ ഇന്ത്യയിൽ മൊത്തം 48 ബില്യൺ ഡോളറിന്റെ നിക്ഷേപം നടത്തുമെന്ന നിർണ്ണായക പ്രഖ്യാപനം പുറത്തുവന്നത്. ഇതിൽ 13 ബില്യൺ ഡോളർ ആർട്ടിഫിഷ്യൽ ഇന്റലിജൻസ് (എഐ), ക്ലൗഡ് ഇൻഫ്രാസ്ട്രക്ചർ വികസനത്തിനായി മാത്രമായിരിക്കും ആമസോൺ ചെലവഴിക്കുക.
ഈ വമ്പൻ നിക്ഷേപം ഇന്ത്യയെ ആഗോളതലത്തിൽ തന്നെ എഐ, ക്ലൗഡ് സേവനങ്ങളുടെ പ്രധാന കേന്ദ്രമാക്കി മാറ്റും. മുംബൈയിലും ഹൈദരാബാദിലും ആമസോൺ വെബ് സർവീസസ് ഡാറ്റാ സെന്ററുകൾ കൂടുതൽ വിപുലീകരിക്കും. സ്റ്റാർട്ടപ്പുകൾക്കും സർക്കാർ സ്ഥാപനങ്ങൾക്കും അത്യാധുനിക എഐ ചിപ്പുകളും സുരക്ഷിതമായ ക്ലൗഡ് സാങ്കേതികവിദ്യയും വേഗത്തിൽ ലഭ്യമാക്കാൻ ഇത് സഹായിക്കും. ഇ-കൊമേഴ്സ് മേഖലയിൽ കൂടുതൽ വളർച്ച ലക്ഷ്യമിടുന്ന ആമസോൺ, ഈ വർഷം തന്നെ 20 പുതിയ ഫുൾഫിൽമെന്റ് സെന്ററുകളും 100-ലധികം ഡെലിവറി സ്റ്റേഷനുകളും തുറക്കാനും പദ്ധതിയിടുന്നു.
ഇന്ത്യൻ വിപണിയോടുള്ള ആമസോണിന്റെ ദീർഘകാല പ്രതിബദ്ധതയാണ് ഈ നിക്ഷേപത്തിലൂടെ വ്യക്തമാകുന്നത്. 2010 മുതൽ 2030 വരെയുള്ള കാലയളവിൽ ഇന്ത്യയിൽ നടത്തുന്ന ആകെ നിക്ഷേപം 88 ബില്യൺ ഡോളറായി ഉയരും. ഡിജിറ്റൽ ഇന്ത്യ എന്ന ലക്ഷ്യത്തിന് കരുത്തേകാൻ 3.8 ദശലക്ഷം തൊഴിലവസരങ്ങൾ സൃഷ്ടിക്കാനും, 15 ദശലക്ഷം ചെറുകിട ബിസിനസ്സുകളെ എഐ സാങ്കേതികവിദ്യയിലൂടെ ഉയർത്താനും, 4 ദശലക്ഷം സർക്കാർ സ്കൂൾ വിദ്യാർത്ഥികൾക്ക് എഐ വിദ്യാഭ്യാസം നൽകാനും കമ്പനി ലക്ഷ്യമിടുന്നു. ഇന്ത്യയുടെ വികസന സ്വപ്നങ്ങളിൽ പങ്കാളിയാകാൻ കഴിഞ്ഞതിൽ അഭിമാനമുണ്ടെന്ന് ആൻഡി ജാസ്സി വ്യക്തമാക്കി. നിലവിൽ 12 ദശലക്ഷം ചെറുകിട ബിസിനസ്സുകളെ ഡിജിറ്റൈസ് ചെയ്യാനും, 20 ബില്യൺ ഡോളറിന്റെ കയറ്റുമതി സാധ്യമാക്കാനും ആമസോണിന് കഴിഞ്ഞിട്ടുണ്ട്.
