പാരിസ്: ഫ്രഞ്ച് ഓപ്പണ് (റോളണ്ട് ഗാരോസ് 2026) ടെന്നീസില് വന് അട്ടിമറി. ലോക ഒന്നാം നമ്പര് താരമായ ആര്യന സബാലങ്കയെ അവിശ്വസനീയമായ പോരാട്ടത്തിലൂടെ പരാജയപ്പെടുത്തി റഷ്യയുടെ യുവതാരം ഡയാന ഷ്നൈഡര് കരിയറിലെ ആദ്യ ഗ്രാന്ഡ് സ്ലാം സെമിഫൈനലില് പ്രവേശിച്ചു. 3-6, 7-5, 6-0 എന്ന സ്കോറിനാണ് ഷ്നൈഡര് വിജയം സ്വന്തമാക്കിയത്.
ഒരു ഘട്ടത്തില് തോല്വിയുടെ വക്കില് നിന്ന ശേഷമാണ് ഷ്നൈഡര് മത്സരത്തിലേക്ക് ശക്തമായി തിരിച്ചുവന്നത്. ഒന്നാം സെറ്റ് നഷ്ടപ്പെടുകയും രണ്ടാം സെറ്റില് 3-5 എന്ന നിലയില് സബാലങ്ക വിജയത്തിന് തൊട്ടടുത്ത് നില്ക്കുകയും ചെയ്തപ്പോഴായിരുന്നു റഷ്യന് താരത്തിന്റെ അവിശ്വസനീയമായ കുതിപ്പ്. സബാലങ്കയുടെ സര്വ് തുടര്ച്ചയായി ആറ് തവണ ബ്രേക്ക് ചെയ്തുകൊണ്ട് മത്സരം പൂര്ണ്ണമായും തന്റെ കൈപ്പിടിയിലൊതുക്കാന് ഷ്നൈഡറിന് സാധിച്ചു. ടൂര്ണമെന്റിലുടനീളം ഒരു സെറ്റ് പോലും നഷ്ടപ്പെടുത്താതെ ക്വാര്ട്ടറിലെത്തിയ സബാലങ്കയുടെ ആധിപത്യത്തിനാണ് കോര്ട്ട് ഫിലിപ്പ്-ചാട്രിയറില് ഷ്നൈഡര് അന്ത്യം കുറിച്ചത്. കരിയറില് ആദ്യമായാണ് ഷ്നൈഡര് ലോക ഒന്നാം നമ്പര് താരത്തെ പരാജയപ്പെടുത്തുന്നത്. നാലാം റൗണ്ടില് മുന് ഗ്രാന്ഡ് സ്ലാം ചാമ്പ്യനായ മാഡിസണ് കീസിനെ വീഴ്ത്തിയതിന് പിന്നാലെയാണ് താരത്തിന്റെ ഈ നേട്ടം.
മത്സരത്തിന് ശേഷം പ്രതികരിക്കവെ, താന് അങ്ങേയറ്റം സന്തോഷവതിയാണെന്നും കഠിനമായ കാറ്റുള്ള കാലാവസ്ഥയില് ഓരോ പോയിന്റിലും ശ്രദ്ധ കേന്ദ്രീകരിക്കാനാണ് ശ്രമിച്ചതെന്നും ഷ്നൈഡര് വ്യക്തമാക്കി. ആദ്യ സെറ്റില് എതിരാളിയുടെ ഗെയിമിനോടും കോര്ട്ടിലെ സാഹചര്യങ്ങളോടും പൊരുത്തപ്പെടാന് ബുദ്ധിമുട്ടിയെങ്കിലും, സമ്മര്ദ്ദത്തിന് വഴങ്ങാതെ അവസാന നിമിഷം വരെ പോരാടിയതാണ് വിജയം സമ്മാനിച്ചത്. മൂന്നാം സെറ്റില് സബാലങ്കയ്ക്ക് ഒരവസരം പോലും നല്കാതെ 6-0 ന് സെറ്റ് തൂത്തുവാരിയ ഷ്നൈഡര്, ടൂര്ണമെന്റിലെ തന്റെ കുതിപ്പ് തുടരാനുള്ള തയ്യാറെടുപ്പിലാണ്.
