നെടുമങ്ങാട്: നെടുമങ്ങാട് ഒന്നര വയസ്സുകാരൻ കൊല്ലപ്പെട്ട കേസിൽ റിമാൻഡിലായ പ്രതികൾക്കെതിരെ അതീവ ഗുരുതരമായ കണ്ടെത്തലുകളുമായി പോലീസ്. ക്രൂരമായ മർദ്ദനമുറകൾക്ക് ഇരയായാണ് കുഞ്ഞ് മരണപ്പെട്ടതെന്ന് വ്യക്തമാക്കുന്ന നിർണ്ണായക വിവരങ്ങളാണ് അന്വേഷണ സംഘത്തിന് ലഭിച്ചിരിക്കുന്നത്. കേസിൽ അറസ്റ്റിലായ അഷകർ, കുട്ടിയുടെ അമ്മ അഖില എന്നിവർ നിലവിൽ 14 ദിവസത്തെ ജുഡീഷ്യൽ കസ്റ്റഡിയിലാണ്. അഷകർ കുഞ്ഞിനെ നിരന്തരമായി ഉപദ്രവിക്കാറുണ്ടായിരുന്നുവെന്ന് അഖില പോലീസിന് മൊഴി നൽകിയിട്ടുണ്ട്.
കുഞ്ഞിനെ കൈകൊണ്ടും വടികൊണ്ടും പ്രതി ക്രൂരമായി മർദ്ദിക്കുന്നത് പലതവണ നേരിട്ട് കണ്ടിട്ടും അത് തടയാൻ അഖില തയ്യാറായില്ലെന്ന് മാത്രമല്ല, വിവരം പുറത്തറിയാതെ ഒളിച്ചുവെക്കുകയും ചെയ്തു. കുഞ്ഞ് മരണപ്പെട്ട ദിവസം നടന്ന മർദ്ദനസമയത്ത് അഖില സ്ഥലത്തുണ്ടായിരുന്നില്ലെന്നാണ് പോലീസിന്റെ പ്രാഥമിക നിഗമനം. പ്രതിയുടെ വീട്ടിലെ മറ്റ് അംഗങ്ങൾക്ക്, പ്രത്യേകിച്ച് അമ്മയ്ക്കും സഹോദരിക്കും ഈ ക്രൂരതകളെക്കുറിച്ച് അറിവുണ്ടായിരുന്നോ എന്ന കാര്യവും പോലീസ് വിശദമായി പരിശോധിക്കുന്നുണ്ട്.
പ്രതികളുടെ പശ്ചാത്തലത്തെക്കുറിച്ചുള്ള ഗുരുതരമായ വിവരങ്ങൾ പുറത്തുവന്നതോടെ അന്വേഷണം മറ്റ് കേസുകളിലേക്കും വ്യാപിപ്പിക്കാൻ പോലീസ് തീരുമാനിച്ചു. അഷകർ തന്റെ ആദ്യ ഭാര്യയായ ആമിനയെ ക്രൂരമായി പീഡിപ്പിച്ചിരുന്നതുമായി ബന്ധപ്പെട്ട വിവരങ്ങളും അഖില ജോലി ചെയ്തിരുന്ന നൃത്തവിദ്യാലയത്തിലെ ചിറയൻകീഴ് സ്വദേശിനിയായ യുവതിയുടെ ആത്മഹത്യയും അന്വേഷണ പരിധിയിലുണ്ട്. വിവാഹ വാഗ്ദാനം നൽകി വഞ്ചിച്ചതിനെത്തുടർന്നാണ് യുവതി ജീവനൊടുക്കിയതെന്ന് പോലീസിന് വിവരം ലഭിച്ചിട്ടുണ്ട്. ഇതിനുപുറമെ, അഖിലയുടെ ആദ്യ ഭർത്താവായ അഖിലിന്റെ മരണത്തിലെ ദുരൂഹതകളും പുതിയ സാഹചര്യത്തിൽ പോലീസ് വീണ്ടും പരിശോധിക്കും.
