ഇടുക്കി: ഇടുക്കി ജില്ലയിലെ പട്ടയ വിതരണവുമായി ബന്ധപ്പെട്ട എല്ലാ തുടർനടപടികളും ഹൈക്കോടതി മരവിപ്പിച്ചത് സംസ്ഥാന സർക്കാരിന് വലിയ തിരിച്ചടിയായി. 1964-ലെ ചട്ടപ്രകാരം പട്ടയം നൽകുന്നതിലുണ്ടായിരുന്ന സ്റ്റേ കോടതി നേരത്തെ നീക്കിയിരുന്നു. എന്നാൽ, വിതരണത്തിൽ കോടതി നൽകിയ കർശന മാനദണ്ഡങ്ങൾ പാലിക്കപ്പെടുന്നില്ലെന്ന് ഹർജിക്കാർ ആരോപിച്ചു. നിയമം ലംഘിച്ച് ഇത്തരത്തിൽ ആയിരത്തിലധികം പട്ടയങ്ങൾ ഇടുക്കിയിൽ വിതരണം ചെയ്തതായും അവർ കോടതിയെ അറിയിച്ചു.
ഇതിനെത്തുടർന്ന്, പട്ടയ വിതരണത്തിൽ ഹൈക്കോടതിയുടെ നിർദേശങ്ങൾ കൃത്യമായി പാലിച്ചിട്ടുണ്ടോ എന്ന് ജസ്റ്റിസ് അനിൽ കെ. നരേന്ദ്രൻ അധ്യക്ഷനായ ഡിവിഷൻ ബെഞ്ച് ആരാഞ്ഞു. പട്ടയ വിതരണ നടപടികൾ ആരംഭിച്ച ഓരോ വ്യക്തിയുടെ കാര്യത്തിലും ഈ നിർദേശങ്ങൾ പാലിക്കപ്പെട്ടിട്ടുണ്ടെന്ന് ചീഫ് സെക്രട്ടറി കോടതിയെ ബോധ്യപ്പെടുത്തണമെന്നും ഡിവിഷൻ ബെഞ്ച് കർശന നിർദേശം നൽകി.
നടപടിക്രമങ്ങളെല്ലാം മുൻപ് തന്നെ പൂർത്തിയായതാണെന്നും, സ്റ്റേ നീങ്ങിയതിന് ശേഷമാണ് വിതരണം ആരംഭിച്ചതെന്നുമുള്ള സർക്കാരിന്റെ വിശദീകരണം കോടതി പൂർണ്ണമായി മുഖവിലയ്ക്കെടുത്തില്ല. തുടർന്നാണ് പട്ടയ വിതരണവുമായി ബന്ധപ്പെട്ട എല്ലാ നടപടികൾക്കും ഹൈക്കോടതി സ്റ്റേ ഏർപ്പെടുത്തിയത്.
