മുംബൈ: ഇന്ത്യൻ ഓഹരി വിപണിയിൽ നിന്ന് വിദേശ നിക്ഷേപകർ കൂട്ടത്തോടെ പിന്മാറുന്നത് വിപണിയിൽ കനത്ത സമ്മർദ്ദം സൃഷ്ടിക്കുന്നു. ആദ്യ വ്യാപാര സെഷനുകളിൽ തന്നെ വിദേശ സ്ഥാപന നിക്ഷേപകർ (എഫ്.പി.ഐ) ക്യാഷ് മാർക്കറ്റ് വിഭാഗത്തിൽ നിന്ന് 8,362.90 കോടി രൂപയുടെ ഓഹരികളാണ് വിറ്റഴിച്ചത്. അതേസമയം, ആഭ്യന്തര സ്ഥാപന നിക്ഷേപകർ 9,589.30 കോടി രൂപയുടെ ഓഹരികൾ വാങ്ങി വിപണിക്ക് നേരിയ പിന്തുണ നൽകാൻ ശ്രമിച്ചെങ്കിലും, വിദേശ നിക്ഷേപകരുടെ വലിയ തോതിലുള്ള വിൽപ്പന സമ്മർദ്ദം ഇന്ത്യൻ സൂചികകളിൽ വലിയ ഇടിവിന് കാരണമായി.
പശ്ചിമേഷ്യയിലെ സംഘർഷങ്ങളും അന്താരാഷ്ട്ര വിപണിയിലെ ഇന്ധന വില വർധനയുമാണ് ആഭ്യന്തര വിപണിയെ പ്രതികൂലമായി ബാധിച്ചിരിക്കുന്നത്. മേഖലയിലെ പുതിയ സൈനിക ആക്രമണങ്ങൾ സംഘർഷം കൂടുതൽ വഷളാക്കിയതോടെ, അസംസ്കൃത എണ്ണ വില ബാരലിന് 96-97 ഡോളറിന് മുകളിൽ എത്തിനിൽക്കുകയാണ്. ഉയർന്ന എണ്ണവില ഇന്ത്യയുടെ ഇറക്കുമതി ചെലവ് വർധിപ്പിക്കുമെന്നും ഇത് രാജ്യത്തെ പണപ്പെരുപ്പത്തിന് കാരണമാകുമെന്നും സാമ്പത്തിക വിദഗ്ധർ മുന്നറിയിപ്പ് നൽകുന്നു.
ഇന്ത്യൻ രൂപയുടെ മൂല്യം ഡോളറിനെതിരെ 95.27 എന്ന നിലയിലേക്ക് കുത്തനെ ഇടിഞ്ഞത് വിപണിയിൽ ആശങ്ക വർധിപ്പിക്കുന്നുണ്ട്. രൂപയുടെ മൂല്യം തകരുമ്പോഴും കേന്ദ്ര സർക്കാരിന്റെ ഭാഗത്തുനിന്ന് കാര്യമായ ഇടപെടലുകൾ ഉണ്ടാകുന്നില്ലെന്ന് ആരോപിച്ച് രാഷ്ട്രീയ നേതാക്കളും വിമർശനവുമായി രംഗത്തെത്തിയിട്ടുണ്ട്. 2026 അവസാനത്തോടെ യുഎസ് ഫെഡറൽ റിസർവ് പലിശനിരക്ക് ഉയർത്താൻ സാധ്യതയുള്ളതും, യുഎസ് ഡോളർ കൂടുതൽ കരുത്താർജ്ജിക്കുന്നതും നിക്ഷേപകരെ ഇന്ത്യൻ വിപണിയിൽ നിന്ന് പിന്മാറാൻ പ്രേരിപ്പിക്കുന്നു. വിദേശ നിക്ഷേപകർ ഇന്ത്യ പോലുള്ള വളർന്നുവരുന്ന വിപണികളിൽ നിന്ന് പിന്മാറി യുഎസ്, തായ്വാൻ തുടങ്ങിയ സുരക്ഷിതമായ വിപണികളിലേക്ക് മൂലധനം മാറ്റുന്ന പ്രവണതയാണ് നിലവിൽ ദൃശ്യമാകുന്നത്.
