മുംബൈ: സംഗീത ലോകത്തെ അത്ഭുതമായി ഇന്നും നിറഞ്ഞുനിൽക്കുന്ന ആശാ ഭോസ്ലെ തൻ്റെ സംഗീത ജീവിതത്തിലെ എട്ടു പതിറ്റാണ്ടുകൾ പൂർത്തിയാക്കി. ഇരുപതിലേറെ ഭാഷകളിലായി പതിനയ്യായിരത്തിലേറെ ഗാനങ്ങൾ ആലപിച്ച അവർ ഇന്ത്യൻ ചലച്ചിത്ര സംഗീത ലോകത്തെ അവിസ്മരണീയമായ സംഭാവനകൾ നൽകിയിട്ടുണ്ട്. സഹോദരിയും ഇതിഹാസ ഗായികയുമായ ലതാ മങ്കേഷ്കറുടെ നിഴലിൽ നിന്ന് സ്വന്തമായ വ്യക്തിമുദ്ര പതിപ്പിച്ച അവർ, ലോകത്ത് ഏറ്റവും കൂടുതൽ ഗാനങ്ങൾ റെക്കോർഡ് ചെയ്ത ഗായിക എന്ന ഗിന്നസ് വേൾഡ് റെക്കോർഡ് (2011) കരസ്ഥമാക്കി. സ്വന്തമായ പാത വെട്ടിത്തുറന്ന ആശാ ഭോസ്ലെ, വെല്ലുവിളികളെ അതിജീവിച്ച് തൻ്റെ സംഗീത യാത്ര തുടരുകയാണ്.
1933-ൽ പ്രശസ്ത സംഗീതജ്ഞൻ ദീനാനാഥ് മങ്കേഷ്കറുടെ മകളായി ജനിച്ച ആശ, പിതാവിൻ്റെ മരണശേഷം പത്താം വയസ്സിലാണ് ചലച്ചിത്ര പിന്നണി ഗാനരംഗത്തേക്ക് കടന്നുവന്നത്. അക്കാലത്ത് സഹോദരി ലത സിനിമകളിൽ നിറഞ്ഞുനിൽക്കുന്ന കാലഘട്ടമായിരുന്നു. ലതയുടെ ശൈലിയിൽ നിന്ന് വ്യത്യസ്തമായ ഒരു വഴി കണ്ടെത്തേണ്ടതിൻ്റെ ആവശ്യകത തിരിച്ചറിഞ്ഞ അവർ, പാശ്ചാത്യ സംഗീതം നിരീക്ഷിച്ചും സ്വന്തം ശബ്ദത്തിലും ആലാപന ശൈലിയിലും വിപ്ലവകരമായ മാറ്റങ്ങൾ കൊണ്ടുവന്നു. തുടക്കത്തിൽ കാബറേ ഗാനങ്ങൾക്കും ഡാൻസ് നമ്പറുകൾക്കും പ്രാധാന്യം ലഭിച്ചെങ്കിലും, പിന്നീട് ഗസലുകൾ, പ്രണയഗാനങ്ങൾ, ഭജനുകൾ, പോപ്പ് സംഗീതം തുടങ്ങി വിവിധ സംഗീതശാഖകളിൽ തൻ്റെ കഴിവ് തെളിയിച്ചു.
‘ഉമ്രാവോ ജാൻ’ എന്ന ചിത്രത്തിലെ ഗസലുകളിലൂടെ ആദ്യത്തെ ദേശീയ അവാർഡ് നേടിയ ആശ, ‘ഇജാസത്ത്’ എന്ന ചിത്രത്തിലെ ‘മേരാ കുച്ച് സാമാൻ’ എന്ന ഗാനത്തിലൂടെ രണ്ടാമത്തെ ദേശീയ അവാർഡും നേടി. രാജ്യം പത്മവിഭൂഷൺ, ദാദാസാഹിബ് ഫാൽക്കേ അവാർഡ് എന്നിവ നൽകി ആദരിച്ചിട്ടുണ്ട്. ഒ.പി. നയ്യാർ, എസ്.ഡി. ബർമ്മൻ, എ.ആർ. റഹ്മാൻ എന്നിവരോടൊപ്പം നിരവധി ഹിറ്റുകൾ സമ്മാനിച്ച അവർ, ഭർത്താവ് ആർ.ഡി. ബർമ്മനൊപ്പമുള്ള കൂട്ടുകെട്ടിലൂടെ ഇന്ത്യൻ സിനിമയിലെ എക്കാലത്തെയും മികച്ച ഗാനങ്ങൾ സൃഷ്ടിച്ചു. സഹോദരി ലതയുമായുള്ള ബന്ധത്തെക്കുറിച്ച് പലപ്പോഴും ഊഹാപോഹങ്ങളുണ്ടായിരുന്നെങ്കിലും, സഹോദരിയുടെ മരണശേഷം വികാരാധീനയായി അവർ പറഞ്ഞ വാക്കുകൾ അവരുടെ സ്നേഹബന്ധത്തിന് അടിവരയിട്ടു. അടുത്തിടെ പുറത്തിറങ്ങിയ ‘ധുരന്ധർ’ എന്ന ചിത്രത്തിൽ ആശാ ഭോസ്ലെയുടെ എക്കാലത്തെയും ഹിറ്റുകളിൽ ഒന്നായ ‘പിയ തൂ അബ് തോ ആജാ’ (1971) എന്ന ഗാനം പുനരാവിഷ്കരിച്ചത് സംഗീത പ്രേമികൾക്കിടയിൽ വലിയ ചർച്ചയായിട്ടുണ്ട്.
