കൊച്ചി: നീറ്റ് പരീക്ഷാ ചോദ്യപ്പേപ്പർ വിഷയവുമായി ബന്ധപ്പെട്ട് ഡൽഹി ജന്തർ മന്തറിൽ നടന്ന സമരത്തെ വിമർശിച്ച് സമൂഹമാധ്യമങ്ങളിൽ വീഡിയോ പങ്കുവെച്ചതിന് അഡ്വ. ടി.ജി. മോഹൻദാസിനെ പൊലീസ് കസ്റ്റഡിയിലെടുത്തു. തിരുവനന്തപുരത്തുനിന്നെത്തിയ സൈബർ പൊലീസ് സംഘം ഞായറാഴ്ച കൊച്ചിയിലെ വീട്ടിലെത്തിയാണ് അദ്ദേഹത്തെ കസ്റ്റഡിയിലെടുത്തത്. വൈദ്യപരിശോധന പൂർത്തിയാക്കിയ ശേഷം ഇദ്ദേഹത്തെ തിരുവനന്തപുരം സൈബർ പോലീസ് സ്റ്റേഷനിലെത്തിച്ചു. തിങ്കളാഴ്ച കോടതിയിൽ ഹാജരാക്കുമെന്ന് പൊലീസ് അറിയിച്ചു.
ഞായറാഴ്ച വൈകിട്ട് അഞ്ചുമണിയോടെയായിരുന്നു മട്ടാഞ്ചേരി പൊലീസിന്റെ സഹായത്തോടെ സൈബർ പൊലീസ് സംഘം ടി.ജി. മോഹൻദാസിന്റെ വീട്ടിലെത്തിയത്. വീഡിയോ അപ്ലോഡ് ചെയ്യാൻ ഉപയോഗിച്ച കമ്പ്യൂട്ടറും മൊബൈൽ ഫോണും ഉൾപ്പെടെയുള്ള ഇലക്ട്രോണിക് ഉപകരണങ്ങൾ പരിശോധനയിൽ പിടിച്ചെടുത്തു. നീറ്റ് പരീക്ഷാ വിവാദത്തിനിടെ ഡൽഹിയിൽ നടന്ന പ്രതിഷേധ സമരങ്ങളെ വിമർശിച്ചുകൊണ്ട് അദ്ദേഹം പുറത്തുവിട്ട വീഡിയോയിലെ പരാമർശങ്ങൾക്കെതിരെ യൂത്ത് കോൺഗ്രസും വിവിധ ഇടത് യുവജന സംഘടനകളും നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്.
കേസ് രജിസ്റ്റർ ചെയ്ത് ദിവസങ്ങൾ പിന്നിട്ടിട്ടും നടപടികൾ സ്വീകരിക്കുന്നില്ലെന്ന് വിവിധ രാഷ്ട്രീയ നേതാക്കൾ ആരോപിച്ചിരുന്നു. ഇതിനുപിന്നാലെയാണ് പൊലീസ് നടപടി ശക്തമാക്കിയത്. നിലവിൽ, രാഷ്ട്രീയ കേന്ദ്രങ്ങളിലും പൊതുസമൂഹത്തിലും വലിയ ചർച്ചകൾക്കാണ് ഈ സംഭവം വഴിവെച്ചിരിക്കുന്നത്. അഭിപ്രായപ്രകടനത്തിന്റെ പേരിലുള്ള നിയമനടപടിയാണോ ഇതെന്ന ചോദ്യവും ഉയരുന്നുണ്ട്. പിടിച്ചെടുത്ത ഉപകരണങ്ങളിലെ വിവരങ്ങൾ പരിശോധിക്കുന്നതടക്കമുള്ള തുടർനടപടികളിൽ കോടതിയുടെ നിലപാട് ഇനി നിർണായകമാകും.
