ഗാസ: ആയുധങ്ങൾ കൈമാറാൻ ഹമാസ് സന്നദ്ധത അറിയിച്ചു
ദീർഘനാളത്തെ സംഘർഷങ്ങൾക്കൊടുവിൽ ഗാസയിൽ നിർണായകമായ രാഷ്ട്രീയ മാറ്റങ്ങൾക്ക് വഴിതുറക്കുന്നു. തങ്ങളുടെ പക്കലുള്ള ആയുധങ്ങൾ കൈമാറാൻ സന്നദ്ധമാണെന്ന് ഹമാസ് നേതൃത്വം ഔദ്യോഗികമായി അറിയിച്ചു. ഗാസയിൽ വെടിനിർത്തൽ പ്രാബല്യത്തിൽ വന്ന് ആറ് മാസത്തിന് ശേഷമാണ് ഹമാസിന്റെ ഭാഗത്തുനിന്നും ഇത്തരമൊരു നിലപാട് മാറ്റം ഉണ്ടാകുന്നത് എന്നത് ശ്രദ്ധേയമാണ്.
ഹമാസിന്റെ കീഴിലുള്ള പോലീസ് സേനയുടെയും ആഭ്യന്തര സുരക്ഷാ വിഭാഗത്തിന്റെയും പക്കലുള്ള ആയിരക്കണക്കിന് ഓട്ടോമാറ്റിക് റൈഫിളുകളും മറ്റ് മാരകായുധങ്ങളും വിട്ടുനൽകാൻ അവർ തയ്യാറായിട്ടുണ്ട്. യുഎസ് പ്രസിഡന്റ് ഡൊണാൾഡ് ട്രംപിന്റെ നേതൃത്വത്തിലുള്ള ‘ബോർഡ് ഓഫ് പീസ്’ എന്ന അന്താരാഷ്ട്ര സംഘടന രൂപീകരിച്ച പലസ്തീൻ അഡ്മിനിസ്ട്രേറ്റീവ് കമ്മിറ്റിക്കായിരിക്കും ഈ ആയുധങ്ങൾ കൈമാറുക. ഗാസയുടെ ഭരണം ഈ പുതിയ സമിതി ഏറ്റെടുക്കുന്നതിന്റെ ഭാഗമായാണ് ഈ നടപടി. നിലവിലെ ഹമാസ് ഭരണകൂടത്തിലെ ജീവനക്കാരെയും പ്രത്യേകിച്ച് പോലീസ് ഉദ്യോഗസ്ഥരെയും പുതിയ ഭരണസംവിധാനത്തിന് കീഴിൽ ഉൾപ്പെടുത്താൻ ബോർഡ് ഓഫ് പീസ് ആലോചിക്കുന്നുണ്ട്.
ഹമാസ് ആയുധം വെക്കാൻ തയ്യാറാണെങ്കിലും ഇസ്രായേലും ട്രംപ് ഭരണകൂടവും ആവശ്യപ്പെടുന്ന ‘സമ്പൂർണ്ണ നിരായുധീകരണം’ എന്ന ലക്ഷ്യത്തോട് ഹമാസ് പൂർണ്ണമായി യോജിച്ചിട്ടില്ല. തങ്ങളുടെ സൈനിക വിഭാഗത്തിന്റെ പക്കലുള്ള ആന്റി-ടാങ്ക് റോക്കറ്റുകൾ ഉൾപ്പെടെയുള്ള വൻ ആയുധശേഖരം വിട്ടുനൽകുന്ന കാര്യത്തിൽ ഹമാസ് ഇതുവരെ വ്യക്തമായ മറുപടി നൽകിയിട്ടില്ല. പലസ്തീൻ രാഷ്ട്രീയത്തിൽ സജീവമായി തുടരാനും ഇസ്രായേലിനെതിരായ പ്രതിരോധം തുടരാനുമാണ് ഹമാസിന്റെ പദ്ധതിയെന്ന് വിദഗ്ധർ വിലയിരുത്തുന്നു. സമാധാന പദ്ധതികൾ പൂർണ്ണമായി തള്ളിക്കളയുന്നു എന്ന ചീത്തപ്പേര് ഒഴിവാക്കാനാണ് ഹമാസ് ഇപ്പോൾ ഇത്തരമൊരു ഭാഗിക വിട്ടുവീഴ്ചയ്ക്ക് തയ്യാറായിരിക്കുന്നത്. ഭരണപരമായ കൈമാറ്റത്തെക്കുറിച്ചും ആയുധങ്ങളുടെ ലിസ്റ്റിനെക്കുറിച്ചുമുള്ള കൂടുതൽ ചർച്ചകൾ ഇപ്പോൾ ഈജിപ്ഷ്യൻ തലസ്ഥാനമായ കൈറോയിൽ പുരോഗമിക്കുകയാണ്. വിദേശത്തുള്ള ഹമാസ് നേതാക്കൾക്ക് പുറമെ, ഗാസയ്ക്കുള്ളിലുള്ള പ്രാദേശിക നേതൃത്വവും ഇത്തവണ ചർച്ചകളിൽ നിർണായക സ്വാധീനം ചെലുത്തുന്നുണ്ട്.
