ഗുരുവായൂർ: ഗൗരവമുള്ള മുഖത്തിന് പിന്നിൽ മക്കൾക്കായി മാത്രം തുടിക്കുന്ന വലിയൊരു ഹൃദയമുണ്ട്. പുറമേ സാധാരണക്കാരായി കാണപ്പെടുമ്പോഴും, ഉള്ളിൽ അസാധാരണമായ കരുത്ത് സൂക്ഷിക്കുന്നവരാണ് പിതാക്കന്മാർ. കത്തുന്ന വെയിലിലും മക്കൾക്ക് തണലായി നിൽക്കുന്ന, നിശബ്ദമായ ത്യാഗങ്ങളുടെ പര്യായമാണ് അച്ഛൻ. ആകാശത്തോളം സ്നേഹം മനസ്സിൽ കൊണ്ടുനടക്കുമ്പോഴും, അത് പുറത്ത് പ്രകടിപ്പിക്കാതെ അടക്കിവെക്കുന്നവരാണവർ. പിറന്നുവീഴുന്ന കുഞ്ഞ് ആദ്യം വിളിക്കുന്നത് അമ്മ എന്നാണെങ്കിലും, ആ അമ്മ ആദ്യം പഠിപ്പിക്കുന്നത് അച്ഛൻ എന്ന സത്യമാണ്. അമ്മയില്ലാത്ത വീടുകളിൽ ആ സ്ഥാനവും കൂടി നെഞ്ചേറ്റുന്ന എത്രയോ അച്ഛന്മാർ നമുക്കിടയിലുണ്ട്.
കുട്ടിക്കാലത്ത് നമ്മളോരോരുത്തരുടെയും ആദ്യത്തെ ഹീറോ അച്ഛനായിരുന്നു. പ്രായമേറി നമ്മൾ വളരുമ്പോഴാണ് ആ ഹീറോ പരിവേഷത്തിന് കൂടുതൽ വ്യക്തത വരുന്നത്. നമ്മളെ തളരാതെ താങ്ങി, എന്നും കാവലായി നിന്ന അദൃശ്യ ശക്തിയാണ് അച്ഛൻ. എന്നാൽ കാലം മാറുമ്പോൾ, വൃദ്ധസദനങ്ങളുടെ നാലുചുവരുകൾക്കുള്ളിലേക്ക് തള്ളപ്പെടുന്ന അച്ഛന്മാരുടെ എണ്ണം കുറവല്ല എന്നത് വേദനിപ്പിക്കുന്ന സത്യമാണ്. സ്വന്തം യൗവനവും സ്വപ്നങ്ങളും മക്കൾക്കായി മാത്രം മാറ്റിവെച്ചവർക്ക്, വിശ്രമകാലത്ത് വേണ്ടത് വൃദ്ധസദനങ്ങളിലെ ഒറ്റപ്പെടലല്ല, മറിച്ച് സ്നേഹവും കരുതലും തന്നെയാണ്.
അച്ഛന്റെ തണലറിഞ്ഞവർ ആ തണൽ തിരികെ നൽകേണ്ട സമയമാണിത്. അച്ഛനെ നഷ്ടപ്പെട്ടവർക്ക് ആ ഓർമ്മകളെ നെഞ്ചോട് ചേർക്കാനും ഈ ദിനം അവസരമൊരുക്കുന്നു. പിതൃദിനം വെറുമൊരു സോഷ്യൽ മീഡിയ ആഘോഷമായി മാത്രം മാറരുത്. ഓരോ അച്ഛന്റെയും കണ്ണീരും അധ്വാനവും തിരിച്ചറിഞ്ഞ്, ആ വേദനകളെയും സ്നേഹത്തെയും ഓർമ്മകളെയും നമുക്ക് ഒന്നിച്ചു ചേർത്തുപിടിക്കാം.
