കൊച്ചി: സ്വർണ്ണവില സർവ്വകാല റെക്കോർഡുകൾ ഭേദിച്ച് മുന്നേറുമ്പോഴും, വരാനിരിക്കുന്ന അക്ഷയതൃതീയയെ വലിയ പ്രതീക്ഷയോടെയാണ് കേരളത്തിലെ സ്വർണ്ണവിപണി ഉറ്റുനോക്കുന്നത്. ഏപ്രിൽ 19 ഞായറാഴ്ചയാണ് ഇത്തവണത്തെ അക്ഷയതൃതീയ. വിലക്കയറ്റം സാധാരണക്കാരെ ആശങ്കയിലാഴ്ത്തുന്നുണ്ടെങ്കിലും, സംസ്ഥാനത്തെ സ്വർണ്ണത്തിന്റെ അഡ്വാൻസ് ബുക്കിംഗിൽ 20% മുതൽ 50% വരെ വർധനവ് രേഖപ്പെടുത്തിയിട്ടുണ്ട്.
വില ഇനിയും കൂടുമെന്ന ആശങ്കയിൽ പലരും നേരത്തെ തന്നെ സ്വർണ്ണം ബുക്ക് ചെയ്യുന്നുണ്ട്. ഭീമ ജ്വല്ലേഴ്സ് ചെയർമാൻ ബി. ഗോവിന്ദൻ പറയുന്നതനുസരിച്ച്, കഴിഞ്ഞ വർഷത്തെ അപേക്ഷിച്ച് ബുക്കിംഗിൽ വൻ വർധനവാണുള്ളത്. കഴിഞ്ഞ വർഷം അക്ഷയതൃതീയ സമയത്ത് ഒരു പവന് 71,840 രൂപയായിരുന്നെങ്കിൽ, ഇത്തവണ അത് 1.12 ലക്ഷം കടന്നിരിക്കുകയാണ്. അതായത് ഒരു പവന് 41,000 രൂപയിലധികം വർധനവ്. എന്നാൽ, ഈ ഉയർന്ന വില കാരണം സ്വർണ്ണാഭരണ വിൽപ്പനയിൽ ഇതിനോടകം തന്നെ 60% ഇടിവ് സംസ്ഥാനത്ത് ഉണ്ടായിട്ടുണ്ട്. കഴിഞ്ഞ തവണ അക്ഷയതൃതീയ ദിനത്തിൽ ഏകദേശം 1500 കിലോയോളം സ്വർണ്ണമാണ് വിറ്റഴിഞ്ഞത്.
വില വർധനവ് മൂലം മുൻവർഷങ്ങളിലെ അത്രയും വലിയ വിൽപ്പന ഇത്തവണ ഉണ്ടാകില്ലെന്ന് വ്യാപാരികൾ കരുതുന്നുണ്ടെങ്കിലും, മെച്ചപ്പെട്ട കച്ചവടം നടക്കുമെന്ന് ഓൾ കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷൻ (AKGSMA) സംസ്ഥാന പ്രസിഡന്റ് ജസ്റ്റിൻ പാലത്ര അറിയിച്ചു. അക്ഷയതൃതീയ ദിവസം മുൻകൂട്ടി ബുക്ക് ചെയ്തവരടക്കം ഏകദേശം 5 ലക്ഷത്തോളം കുടുംബങ്ങൾ ഷോറൂമുകളിൽ എത്തുമെന്നാണ് പ്രതീക്ഷിക്കുന്നതെന്നും, കഴിഞ്ഞ വർഷത്തേക്കാൾ 55% അധികം വിലവർധനവാണ് ഇത്തവണ സ്വർണ്ണത്തിനുള്ളതെന്നും എസ്. അബ്ദുൽ നാസർ, സംസ്ഥാന ജനറൽ സെക്രട്ടറി, AKGSMA വ്യക്തമാക്കി. മോതിരം, കമ്മൽ, മൂക്കുത്തി തുടങ്ങിയ ചെറിയ ആഭരണങ്ങൾ വാങ്ങുന്നവരും വിവാഹ ആവശ്യങ്ങൾക്കായി സ്വർണ്ണം വാങ്ങുന്നവരുമാണ് ഈ ദിനത്തിൽ പ്രധാനമായും വിപണിയിലെത്തുന്നത്. കേരളത്തിലെ ചെറുതും വലുതുമായ ഏകദേശം 12,000 ജ്വല്ലറികൾ അക്ഷയതൃതീയയെ വരവേൽക്കാൻ തയ്യാറെടുത്തിട്ടുണ്ട്.
