കൊച്ചി: കേരളത്തിൽ സ്വർണവിലയിൽ വൻ ഇടിവ്. തുടർച്ചയായി സ്വർണവില താഴേക്ക് ഇറങ്ങുന്ന കാഴ്ചയാണ് വിപണിയിൽ കാണുന്നത്. ഇന്ന് ഒരു പവൻ സ്വർണത്തിന് 1040 രൂപയുടെ വലിയ കുറവാണ് രേഖപ്പെടുത്തിയത്. രാജ്യാന്തര വിപണിയിലെ ചലനങ്ങളും ക്രൂഡ് ഓയിൽ വിലയിലെ മാറ്റങ്ങളുമാണ് സ്വർണത്തിന് തിരിച്ചടിയായത്. സ്വർണം വാങ്ങാൻ കാത്തിരിക്കുന്നവർക്ക് വലിയ ആശ്വാസമാണ് ഈ വിലയിടിവ്.
സംസ്ഥാനത്തെ സ്വർണ്ണ വ്യാപാരികളുടെ സംഘടനയായ എകെജിഎസ്എംഎ നൽകുന്ന വിവരപ്രകാരം 22 ക്യാരറ്റ് സ്വർണം ഗ്രാമിന് 130 രൂപ കുറഞ്ഞ് 14,020 രൂപയായി. ഒരു പവന് (8 ഗ്രാം) 1040 രൂപ ഇടിഞ്ഞ് 1,12,160 രൂപയിലാണ് ഇന്നത്തെ വ്യാപാരം നടക്കുന്നത്. 18 ക്യാരറ്റ് സ്വർണം ഗ്രാമിന് 105 രൂപ കുറഞ്ഞ് 11,580 രൂപയായി നിശ്ചയിച്ചു. സംസ്ഥാനത്ത് വെള്ളി വിലയിൽ മാറ്റമില്ല. ഗ്രാമിന് 260 രൂപയിൽ തന്നെ തുടരുന്നു.
രാജ്യാന്തര വിപണിയുടെ ചുവടുപിടിച്ചാണ് കേരളത്തിലും സ്വർണവില കുത്തനെ കുറഞ്ഞത്. ലോകവിപണിയിൽ സ്വർണവില ഔൺസിന് 31 ഡോളർ ഇടിഞ്ഞ് 4674 ഡോളറിലേക്ക് താഴ്ന്നു. പശ്ചിമേഷ്യ വീണ്ടും സംഘർഷഭരിതമായതോടെ ക്രൂഡ് ഓയിൽ വില ബാരലിന് 100 ഡോളർ കടക്കുമെന്ന നിഗമനമാണ് സ്വർണത്തിന് പ്രധാന തിരിച്ചടിയായത്. എണ്ണവില കൂടുന്നത് ആഗോളതലത്തിൽ വലിയ പണപ്പെരുപ്പത്തിന് കാരണമാകും. ഈ പണപ്പെരുപ്പം നിയന്ത്രിക്കാനായി ലോകമെമ്പാടുമുള്ള കേന്ദ്ര ബാങ്കുകൾ പലിശനിരക്ക് കൂട്ടാൻ നിർബന്ധിതരാകും. പലിശനിരക്ക് ഉയരുമെന്ന വിലയിരുത്തൽ അമേരിക്കൻ ഡോളറിനെ കൂടുതൽ കരുത്തുറ്റതാക്കി. ഡോളർ കരുത്താർജ്ജിച്ചതോടെ സുരക്ഷിത നിക്ഷേപമെന്ന നിലയിലുള്ള സ്വർണത്തിന്റെ ആകർഷണീയത കുറഞ്ഞു. വരും ദിവസങ്ങളിലും പശ്ചിമേഷ്യൻ പ്രതിസന്ധിയും ഡോളറിന്റെ മൂല്യവും എണ്ണവിലയും തന്നെയാകും സ്വർണവിലയെ സ്വാധീനിക്കുന്ന പ്രധാന ഘടകങ്ങൾ. നിക്ഷേപകർ വിപണിയെ വളരെ കരുതലോടെയാണ് ഉറ്റുനോക്കുന്നത്.
