കണ്ണൂർ: മന്ത്രി വീണാ ജോർജിന് നേരെയുണ്ടായ കെ.എസ്.യു പ്രതിഷേധത്തിലും ആക്രമണത്തിലും കൂടുതൽ വിശദീകരണവുമായി സ്പീക്കർ എ.എൻ ഷംസീർ. മന്ത്രിക്ക് പരിക്കേറ്റിരുന്നുവെന്നും കാണുമ്പോൾ അവർ വളരെ അവശയായിരുന്നുവെന്നും അദ്ദേഹം വ്യക്തമാക്കി. എന്നാൽ ആയുധം കൊണ്ട് പരിക്കേറ്റതായി താൻ എവിടെയും പറഞ്ഞിട്ടില്ലെന്നും സ്പീക്കർ കൂട്ടിച്ചേർത്തു.
സംഭവത്തിന് ശേഷം മന്ത്രിയെ കാണുമ്പോൾ അവർ അതീവ അവശയായിരുന്നു. പ്ലാറ്റ്ഫോമിൽ ഇരിക്കുകയായിരുന്ന അവർക്ക് വന്ദേ ഭാരത് ട്രെയിനിൽ കയറി യാത്ര തുടരാൻ സാധിക്കുമായിരുന്നില്ല. ഈ സാഹചര്യത്തിലാണ് അവരെ അടിയന്തരമായി ആശുപത്രിയിലേക്ക് മാറ്റാനുള്ള ക്രമീകരണങ്ങൾ നടത്തിയതെന്നും ഷംസീർ വിശദീകരിച്ചു. വന്ദേ ഭാരതിൽ കയറാൻ കഴിയാത്തവിധം മന്ത്രി അവശയായിരുന്നു.
ഒരു വനിതാ മന്ത്രിക്കെതിരെ നടന്ന സമരത്തിൽ എന്തുകൊണ്ട് കെ.എസ്.യുവിലെ പെൺകുട്ടികൾ പങ്കെടുത്തില്ലെന്ന് സ്പീക്കർ ചോദിച്ചു. ജനാധിപത്യത്തിൽ സമരം ചെയ്യാനും പ്രതിഷേധിക്കാനും എല്ലാവർക്കും അവകാശമുണ്ട്. എന്നാൽ ഇത്തരം സമരങ്ങളുടെ ഭാഗമായി ചിലപ്പോൾ ജയിലിൽ കിടക്കേണ്ടി വരും. ജയിലിൽ കിടത്തിയത് വലിയ അപരാധമായിട്ടാണ് കോൺഗ്രസ് ചിത്രീകരിക്കുന്നതെന്നും അദ്ദേഹം വിമർശിച്ചു. സ്പീക്കർ പദവിയിലെ മൂന്നുവർഷം അഭിമാനകരമാണെന്നും എ.എൻ ഷംസീർ പറഞ്ഞു. സ്പീക്കർ എന്ന നിലയിലുള്ള തന്റെ അവസാനത്തെ പരിപാടിയാണിതെന്നും അദ്ദേഹം കൂട്ടിച്ചേർത്തു. കഴിഞ്ഞ മൂന്ന് വർഷത്തെ പ്രവർത്തനങ്ങളിൽ വലിയ സംതൃപ്തിയുണ്ട്. ഭരണ-പ്രതിപക്ഷ ഭേദമന്യേ എല്ലാവരുമായി സഹകരിച്ചാണ് സഭ മുന്നോട്ട് കൊണ്ടുപോയത്. തന്റെ കാലയളവിൽ നടപ്പിലാക്കിയ പ്രധാന മാറ്റങ്ങൾ ഇവയാണ് സഭ ജനങ്ങളിലേക്ക് നിയമസഭ പൊതുജനങ്ങൾക്കായി തുറന്നുകൊടുത്തു, ലൈബ്രറി പ്രവേശനം നിയമസഭാ ലൈബ്രറിയിലും പൊതുജനങ്ങൾക്ക് പ്രവേശനം അനുവദിച്ചു, പുസ്തകോത്സവം നിയമസഭയുടെ ചരിത്രത്തിലാദ്യമായി വിപുലമായ പുസ്തകോത്സവം സംഘടിപ്പിച്ചു.
പാർട്ടിയും ജനങ്ങളും ഏൽപ്പിച്ച ദൗത്യം മികച്ച രീതിയിൽ ചെയ്യാൻ കഴിഞ്ഞതിൽ അതിയായ അഭിമാനമുണ്ട്. ഭരണ-പ്രതിപക്ഷ വ്യത്യാസമില്ലാതെ സഭയ്ക്കുള്ളിൽ നടക്കുന്ന എല്ലാ കാര്യങ്ങളും ജനങ്ങൾ കാണുന്നുണ്ടെന്നും അതിനാൽ പുതിയതായി വരുന്ന എം.എൽ.എമാർ നിയമസഭയെ കൂടുതൽ ഗൗരവമായി കാണണമെന്നും അദ്ദേഹം ഓർമ്മിപ്പിച്ചു. സ്പീക്കർ പദവി ഒഴിയുന്നതോടെ പാർട്ടി പ്രവർത്തനങ്ങളിലും രാഷ്ട്രീയത്തിലും താൻ കൂടുതൽ സജീവമാകുമെന്നും സംസ്ഥാനത്ത് എൽ.ഡി.എഫിന്റെ ഭരണത്തുടർച്ച ഉറപ്പാണെന്നും എ.എൻ ഷംസീർ വ്യക്തമാക്കി.
