ദേശീയം: ആധുനിക യുദ്ധതന്ത്രങ്ങളിൽ നിർണായക മാറ്റങ്ങൾ വരുത്തി ചൈന. ഒറ്റയടിക്ക് 96 ഡ്രോണുകൾ വരെ വിക്ഷേപിക്കാൻ ശേഷിയുള്ള ‘അറ്റ്ലസ് ഡ്രോൺ സ്വാം’ എന്ന പുതിയ ആയുധം ചൈനീസ് സൈന്യം പുറത്തിറക്കി. ലളിതമായ നിയന്ത്രണ സംവിധാനങ്ങളുള്ള ഈ ആയുധം ഇന്ത്യയുൾപ്പെടെയുള്ള അയൽരാജ്യങ്ങൾക്ക് വലിയ സുരക്ഷാ ഭീഷണിയാണ് ഉയർത്തുന്നത്.
ചൈന ഇലക്ട്രോണിക്സ് ടെക്നോളജി ഗ്രൂപ്പ് കോർപ്പറേഷൻ ആണ് ഈ അത്യാധുനിക പ്രതിരോധ സംവിധാനം വികസിപ്പിച്ചത്. ഒരു കമാൻഡ് വെഹിക്കിൾ, ഒരു ലോഞ്ച് വെഹിക്കിൾ, ഒരു സപ്പോർട്ട് വെഹിക്കിൾ എന്നിവ അടങ്ങുന്നതാണ് ഈ യൂണിറ്റ്. ഒരു കമാൻഡ് യൂണിറ്റിൽ നിന്ന് ഒരേസമയം 96 ഡ്രോണുകളെ വിക്ഷേപിക്കാനും അവയെ ഏകോപിപ്പിച്ച് കൃത്യമായ ആക്രമണം നടത്താനും ഇതിലൂടെ സാധിക്കും. വെറും 300 സെക്കൻഡിനുള്ളിൽ 96 ഡ്രോണുകളെയും വായുവിലെത്തിക്കാൻ അറ്റ്ലസ് സംവിധാനത്തിന് കഴിയും. ഇതിലെ ഓരോ ഡ്രോണും ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ സഹായത്തോടെയാണ് പ്രവർത്തിക്കുന്നത്. ലക്ഷ്യങ്ങൾ സ്വയം ചിന്തിച്ച് തിരിച്ചറിയാനും ആക്രമിക്കാനും ഇവയ്ക്ക് ശേഷിയുണ്ട്. ശത്രുക്കളുടെ ആക്രമണത്തിൽ ഒരു ഡ്രോൺ തകർക്കപ്പെട്ടാലും ബാക്കിയുള്ളവ ദൗത്യം തുടരും എന്നത് ഇതിന്റെ പ്രഹരശേഷി വർദ്ധിപ്പിക്കുന്നു. വളരെ കുറച്ച് സൈനികരെ ഉപയോഗിച്ച് നെറ്റ്വർക്ക് കേന്ദ്രീകൃതമായ കൂട്ട ആക്രമണങ്ങൾ നടത്താം എന്നതാണ് ഇതിന്റെ പ്രധാന സവിശേഷത.
ചൈനയുമായുള്ള യഥാർത്ഥ നിയന്ത്രണരേഖയിൽ, പ്രത്യേകിച്ച് ടിബറ്റ്, സിൻജിയാങ് മേഖലകളിൽ ചൈന ഈ ഡ്രോൺ കൂട്ടങ്ങളെ വിന്യസിച്ചേക്കാം എന്നാണ് പ്രതിരോധ വിദഗ്ദ്ധർ നൽകുന്ന മുന്നറിയിപ്പ്. നൂറുകണക്കിന് ഡ്രോണുകൾ ഒന്നിച്ച് ആക്രമിക്കാൻ വന്നാൽ, നിലവിലെ മിസൈൽ പ്രതിരോധ സംവിധാനങ്ങൾക്ക് അതിനെ നേരിടുക എന്നത് വലിയ വെല്ലുവിളിയാകും. അതിർത്തിയിലെ ഇന്ത്യൻ സൈന്യത്തിന്റെ റോഡുകൾ, പാലങ്ങൾ, ആശയവിനിമയ സംവിധാനങ്ങൾ എന്നിവ കൃത്യതയോടെ ലക്ഷ്യം വെക്കാൻ അറ്റ്ലസിന് സാധിക്കും. വിലകൂടിയ യുദ്ധവിമാനങ്ങളോ മിസൈലുകളോ ഉപയോഗിക്കാതെ തന്നെ വലിയ നാശനഷ്ടങ്ങൾ സൃഷ്ടിക്കാൻ ചൈനയ്ക്ക് ഇതിലൂടെ കഴിയും. ചൈനയുടെ ഈ നൂതന ആയുധത്തെ നേരിടാൻ ഇന്ത്യയും സജ്ജമാവുകയാണ്. ഇതിന് മറുപടിയായി ഇന്ത്യ സ്വന്തമായി ഡ്രോൺ സ്വാം സാങ്കേതികവിദ്യ വികസിപ്പിച്ചെടുക്കുന്നുണ്ട്. ഇതിനുപുറമെ, ശത്രു രാജ്യങ്ങളുടെ ഡ്രോണുകളെ ജാം ചെയ്ത് നിർവീര്യമാക്കാൻ സഹായിക്കുന്ന അത്യാധുനിക ആന്റി-ഡ്രോൺ സംവിധാനങ്ങളും ലേസർ അധിഷ്ഠിത ആയുധങ്ങളും അതിർത്തിയിൽ വിന്യസിക്കാനുള്ള നടപടികൾ ഇന്ത്യൻ സൈന്യം വേഗത്തിലാക്കിയിട്ടുണ്ട്. വരും നാളുകളിൽ ഇന്ത്യാ-ചൈന അതിർത്തിയിലെ പ്രതിരോധ തന്ത്രങ്ങളിൽ ഈ ഡ്രോൺ സാങ്കേതികവിദ്യകൾ നിർണായക പങ്ക് വഹിക്കും.
