സിംഗപ്പൂര്: ആഗോള തന്ത്രപ്രധാന മേഖലയായ ഇന്തോ-പസഫിക്കിലെ സുരക്ഷാ വെല്ലുവിളികള് നേരിടുന്നതിനും ഉഭയകക്ഷി പ്രതിരോധ സഹകരണം ശക്തമാക്കുന്നതിനുമായി ഇന്ത്യയും അമേരിക്കയും തമ്മില് നിര്ണ്ണായക ചര്ച്ചകള് നടന്നു. സിംഗപ്പൂരില് നടക്കുന്ന പ്രമുഖ അന്താരാഷ്ട്ര പ്രതിരോധ ഉച്ചകോടിയായ ‘ഷാംഗ്രി-ലാ ഡയലോഗ് 2026’-ന്റെ ഭാഗമായി ഇന്ത്യന് പ്രതിരോധ സെക്രട്ടറി രാജേഷ് കുമാര് സിംഗ്, യുഎസ് ഇന്തോ-പസഫിക് കമാന്ഡ് മേധാവി അഡ്മിറല് സാമുവല് ജെ. പാപ്പാരോയുമായി കൂടിക്കാഴ്ച നടത്തി.
ഇരുരാജ്യങ്ങളും തമ്മിലുള്ള സൈനിക സഹകരണം ദൃഢമാക്കുന്നതിനും ഇന്തോ-പസഫിക് മേഖലയിലെ പുതിയ സുരക്ഷാ വെല്ലുവിളികളെ ഒന്നിച്ച് നേരിടുന്നതിനെക്കുറിച്ചുമാണ് ചര്ച്ചകള് പ്രധാനമായും കേന്ദ്രീകരിച്ചതെന്ന് ഇന്ത്യന് പ്രതിരോധ മന്ത്രാലയത്തിന് കീഴിലുള്ള ഡയറക്ടറേറ്റ് ഓഫ് പബ്ലിക് റിലേഷന്സ് അറിയിച്ചു. ആഗോള തന്ത്രപ്രധാന മത്സരങ്ങളുടെ പ്രധാന വേദിയായി ഇന്തോ-പസഫിക് മാറിയിരിക്കുന്ന സാഹചര്യത്തില്, ഇന്ത്യ-യുഎസ് പ്രതിരോധ ബന്ധം കൂടുതല് ആഴത്തിലാക്കാനുള്ള ഇരുരാജ്യങ്ങളുടെയും പ്രതിജ്ഞാബദ്ധത കൂടിക്കാഴ്ചയില് വീണ്ടും അടിവരയിട്ടു. ആഗോള സമുദ്ര വ്യാപാരത്തിന്റെ 60 ശതമാനവും കടന്നുപോകുന്നത് ഈ മേഖലയിലൂടെയാണെന്നിരിക്കെ, ഇന്ത്യയുടെ സുരക്ഷാ സമവാക്യങ്ങളില് ഇന്തോ-പസഫിക് പ്രദേശം വഹിക്കുന്ന പങ്ക് നിര്ണ്ണായകമാണ്.
ന്യൂഡല്ഹിയില് നടന്ന ‘ക്വാഡ്’ വിദേശകാര്യ മന്ത്രിമാരുടെ യോഗത്തിന് തൊട്ടുപിന്നാലെയാണ് പ്രതിരോധ സെക്രട്ടറിയുടെ ഈ സിംഗപ്പൂര് സന്ദര്ശനം. ക്വാഡ് കൂട്ടായ്മയുടെ ഭാഗമായി പുതിയ അടിസ്ഥാന സൗകര്യ വികസന പദ്ധതികളും മാരിടൈം സര്വൈലന്സ് ഇനിഷ്യേറ്റീവും പ്രഖ്യാപിച്ചതിന് പിന്നാലെയാണ് പ്രതിരോധ മേഖലയിലെ ഈ നീക്കങ്ങള്. സിംഗപ്പൂര് ഉച്ചകോടിയുടെ ഭാഗമായി നാറ്റോ മിലിട്ടറി കമ്മിറ്റി മേധാവി അഡ്മിറല് ഗ്യൂസെപ്പെ കാവോ ഡ്രാഗണ്, കാനഡയുടെ സീനിയര് അസോസിയേറ്റ് ഡെപ്യൂട്ടി പ്രതിരോധ മന്ത്രി കെല്വിന് ബ്രോസ്സോ, സെയ്ഷെല്സ് പ്രതിരോധ സേനാ മേധാവി മേജര് ജനറല് മൈക്കല് റോസെറ്റ് എന്നിവരുമായും രാജേഷ് കുമാര് സിംഗ് കൂടിക്കാഴ്ച നടത്തി. സിംഗപ്പൂര് പ്രതിരോധ സ്ഥിര സെക്രട്ടറി ജോസഫ് ലിയോങ്ങുമായി ചേര്ന്ന് 16-ാമത് ‘ഡിഫന്സ് പോളിസി ഡയലോഗിന്’ അദ്ദേഹം സഹ-അധ്യക്ഷത വഹിക്കുകയും ചെയ്തു.
