തിരുവനന്തപുരം: പതിനാറാം കേരള നിയമസഭയുടെ ആദ്യ സമ്മേളനം ഇന്ന് ആരംഭിക്കും. രാവിലെ 9 മണിക്ക് പുതിയ എംഎൽഎമാരുടെ സത്യപ്രതിജ്ഞാ ചടങ്ങുകൾ നടക്കും. പ്രോടേം സ്പീക്കർ ജി. സുധാകരൻ എംഎൽഎമാർക്ക് സത്യവാചകം ചൊല്ലിക്കൊടുക്കും. ഇന്നലെയാണ് ജി. സുധാകരൻ ഗവർണർക്ക് മുമ്പാകെ പ്രോടേം സ്പീക്കറായി സത്യപ്രതിജ്ഞ ചെയ്തത്. നാളെ നിയമസഭാ സ്പീക്കറെ തിരഞ്ഞെടുക്കും.
സമ്മേളനത്തിന്റെ പ്രധാന പ്രത്യേകത 140 അംഗ സഭയിൽ 70 പേരും പുതുമുഖങ്ങളാണ് എന്നതാണ്. ഏറ്റവും കൂടുതൽ തവണ വിജയിച്ച എംഎൽഎ എന്ന റെക്കോർഡ് പി.കെ. കുഞ്ഞാലിക്കുട്ടിക്കാണ്. അദ്ദേഹം ഒൻപതാം തവണയാണ് നിയമസഭയിൽ എത്തുന്നത്. മുൻ മുഖ്യമന്ത്രി പിണറായി വിജയൻ എട്ടാം തവണയാണ് നിയമസഭാംഗമാകുന്നത്.
ഈ നിയമസഭയിൽ പ്രധാന മുന്നണികൾക്കെല്ലാം പ്രാതിനിധ്യമുണ്ട്. ആകെ 13 രാഷ്ട്രീയ പാർട്ടികളാണ് സഭയിലുള്ളത്. ചരിത്രത്തിലാദ്യമായി ബിജെപിക്ക് മൂന്ന് അംഗങ്ങളെ സഭയിൽ എത്തിക്കാൻ കഴിഞ്ഞു എന്നത് ഈ തിരഞ്ഞെടുപ്പിന്റെ ഒരു പ്രത്യേകതയാണ്. കക്ഷിനില താഴെ നൽകുന്നു കോൺഗ്രസ് 63, സി.പി.ഐ (എം) 26, മുസ്ലിം ലീഗ് 22, സി.പി.ഐ 8, കേരള കോൺഗ്രസ് 7, ആർ.എസ്.പി 3, ബിജെപി 3 എന്നിങ്ങനെയാണ് അംഗബലം.
