വിപണി നിരീക്ഷണം:
തിങ്കളാഴ്ച ഉച്ചയ്ക്ക് ശേഷമുള്ള വ്യാപാരത്തിൽ ഓഹരി സൂചികകൾ രാവിലെ നേരിട്ട നഷ്ടം നികത്താൻ ശ്രമിക്കുന്നു. വിപണിയിൽ രണ്ട് തരം ഓഹരികളുടെ പ്രകടനമാണ് ദൃശ്യമായത്. വൻകിട ബാങ്കിംഗ്, എനർജി, മെറ്റൽ ഓഹരികൾ സൂചികകളെ താഴേക്ക് വലിച്ചപ്പോൾ ഐടി, ഫാർമ മേഖലകൾ വിപണിക്ക് പ്രതിരോധം തീർത്തു.
ടാറ്റ സ്റ്റീൽ ഓഹരികളിൽ 3.15 ശതമാനം ഇടിവുണ്ടായി. മാർച്ച് മാസത്തിൽ അവസാനിച്ച പാദത്തിലെ സാമ്പത്തിക ഫലങ്ങൾ വിപണി കണക്കുകൂട്ടിയതിലും മങ്ങിയതിനെ തുടർന്ന് ഓഹരി വില 5 ശതമാനത്തിനടുത്ത് ഇടിഞ്ഞു. 52 ആഴ്ചയിലെ ഉയർന്ന വില 224.40 രൂപയും, കുറഞ്ഞ വില 149.50 രൂപയുമാണ്. ഇന്ന് 210.01 രൂപയിലാണ് വ്യാപാരം അവസാനിച്ചത്. പ്രതീക്ഷിച്ചതിലും കുറഞ്ഞ ത്രൈമാസ ലാഭം, ഉയർന്ന അസംസ്കൃത വസ്തുക്കളുടെ സമ്മർദ്ദം, യൂറോപ്പിൽ വർദ്ധിച്ചു വരുന്ന പ്രവർത്തന വെല്ലുവിളികൾ എന്നിവ ഓഹരികൾ ഇടിയാൻ കാരണമായി. യൂറോപ്പിലെ ബിസിനസ്സിലുള്ള അനിശ്ചിതത്വവും കമ്പനിയുടെ നെതർലാൻഡ്സ്, യുകെ പ്രവർത്തനങ്ങളും ഉയർന്ന ചിലവ് എന്ന വെല്ലുവിളി നേരിടുന്നു.
പവർ ഗ്രിഡ് അറ്റാദായത്തിൽ വളർച്ച രേഖപ്പെടുത്തിയെങ്കിലും, പ്രവർത്തനമികവ് വിപണിയുടെ പ്രതീക്ഷകൾക്കൊത്ത് ഉയരാത്തതിനാൽ ഓഹരി വില സമ്മർദ്ദത്തിലാണ്. എച്ച്ഡിഎഫ്സി ബാങ്ക്, റിലയൻസ് ഇൻഡസ്ട്രീസ് തുടങ്ങിയ ഓഹരികളിലും ഇടിവുണ്ടായി.
